2026 നവംബർ 19, വ്യാഴാഴ്‌ച

ചെല്ലാനം കടൽകയറ്റം-: സർക്കാർ ലക്ഷ്യമിടുന്നതെന്ത് ?

 ചെല്ലാനം കടൽകയറ്റം-:  സർക്കാർ ലക്ഷ്യമിടുന്നതെന്ത്  ?

ചെല്ലാനമെന്നത് ഇന്ന് കടൽകയറ്റത്തിന്റെ ഒരു സമവാക്യനാമമായി പൊതുസമൂഹത്തിനു മുന്നിൽ നിവർന്നു കഴിഞ്ഞു. അതിന്റെ ചരിത്രം നോക്കിയാൽ ഒരു നൂറ്റാണ്ടു തന്നെ മുന്നിൽ വിരിഞ്ഞേക്കും. എന്നാൽ ചെല്ലാനം-കൊച്ചി തീരത്തിന്റെ സ്വഭാവം ഗണ്യമായി മാറുന്നത് 1341 ലെ വെള്ളപ്പൊക്കത്തിൽ കൊടുങ്ങല്ലൂർ അഴിമുഖം മൂടിപ്പോയി പകരം കൊച്ചിയിൽ അഴി തുറന്നതോടു കൂടിയാണ്. പിന്നീട് മെല്ലെ മെല്ലെ തുറമുഖമെന്ന നിലയിൽ മുസിരിസ് നിർജ്ജീവമാകുകയും കൊച്ചി കപ്പൽച്ചാലിന്റെ ആഴം കൂട്ടി അത് സജീവമാകുകയും ചെയ്യുന്നു. ആധുനിക രീതിയിൽ കൊച്ചി തുറമുഖം പണി കഴിപ്പിക്കാൻ ഒരുങ്ങുന്നത് 1918 ഓടു കൂടിയാണ്. സർ ജോൺ വോൾഫ് ബാരി ലൈസ്റ്റർ 18.01.1918 ന് സമർപ്പിച്ച റിപ്പോർട്ടിൽ വളരെ വ്യക്തമായി പറയുന്നുണ്ട്, ഈ തുറമുഖം മൂലം അതിന്റെ ഇരുകരകളിലെയും തീരങ്ങൾക്ക് നാശങ്ങളുണ്ടാകാൻ സാധ്യതയുണ്ടെന്നും അതുകൊണ്ട് തന്നെ ആ തീരങ്ങളായ ഫോർട്ട് കൊച്ചിയും വൈപ്പിനും രണ്ട് മൈൽ നീളമുള്ള പുലിമുട്ട് കെട്ടി സംരക്ഷിക്കണമെന്നും. എന്നാൽ ഒരു നൂറ്റാണ്ടിനിപ്പുറവും ആ നിർദ്ദേശങ്ങൾ പാലിക്കപ്പെട്ടിട്ടില്ല.

    എന്നാൽ അന്നത്തെ കടൽകയറ്റവും ഇന്നത്തെ കടൽകയറ്റവും തമ്മിൽ അജഗജാന്തര വ്യതാസമുണ്ട്.      അന്നൊക്കെ ചെല്ലാനത്ത് വിശാലമായ കടപ്പുറമുണ്ടായിരുന്നു. കേരളത്തിലെ മറ്റേതു നാട്ടിൻപുറവുമെന്ന പോലെ സസ്യജാലങ്ങളാൽ സമൃദ്ധമായിരുന്നു എറണാകുളം ജില്ലയുടെ തെക്കു-പടിഞ്ഞാറേ അതിർത്തിഗ്രാമമായി, ഒരു റിബ്ബൺ പോലെ നീളത്തിൽ കിടക്കുന്ന ആ തീരം. അവിടെ ചെളി കലർന്ന കണ്ടലും കൈതയും മുഞ്ചയും ഉപ്പൂത്തയും മറ്റും നിറഞ്ഞ ചതുപ്പുകൾ ഉണ്ടായിരുന്നു. മഴക്കാലത്ത് ഈ ചളി കടലിൽ കലർന്ന് സാന്ദ്രത കൂടി തിരമാലകളുടെ ശക്തി കുറയ്ക്കുമായിരുന്നു. അതിലെ പ്ലവകങ്ങളെ തിന്നാനെത്തുന്ന ചെറുമീനുകളെ തിന്നാൻ വലിയ മീനുകൾ എത്തുകയും അങ്ങനെ ചാകരയെന്ന പ്രതിഭാസം ഉണ്ടാവുകയും ചെയ്തിരുന്നു. വേലിയേറ്റ വേലിയിറക്ക സമയങ്ങളിലെ കടലും കായലും തമ്മിലുള്ള കൊടുക്കൽ വാങ്ങലുകൾ സുഗമമാക്കാൻ മികച്ച രീതിയിലുള്ള നീരൊഴുക്ക് സംവിധാനങ്ങൾ അവിടെ നിലനിന്നിരുന്നു. തീരത്തിന് സമാന്തരമായി രണ്ടു വലിയ കനാലുകളും അവയിലൂടെ കടലിനേയും കായലിനേയും തമ്മിൽ ബന്ധിപ്പിക്കാൻ ചെറു ചാലുകളും അടങ്ങിയ ഒരു സംവിധാനമായിരുന്നു അത്. കായലിൽ നിന്നും കടലിലെത്തിച്ചേരുന്ന എക്കലടങ്ങിയ ശാന്തമായ ഭാഗത്തെ മഡ്ബാങ്ക് എന്നും വിളിച്ചിരുന്നു. ആദ്യകാലങ്ങളിലെ കടൽകയറ്റങ്ങൾക്ക് ഈ മഡ്ബാങ്ക് എന്ന പ്രതിഭാസവും കാരണമാകുന്നതായി ചില പഠനങ്ങൾ ചൂണ്ടിക്കാണിക്കുന്നുണ്ട്. എന്നാൽ 2015 ലെ തീരശോഷണത്തെ കുറിച്ചുള്ള ഒരു പഠനത്തിൽ കഴിഞ്ഞ 40 വർഷങ്ങളായി അന്ധകാരനഴി, ചെല്ലാനം, ഞാറയ്ക്കൽ, എടവനക്കാട് എന്നീ തീരങ്ങളിൽ മഡ്ബാങ്ക് ഉണ്ടാകുന്നില്ല എന്ന് വ്യക്തമാക്കുന്നു. ഇത് വിരൽ ചൂണ്ടുന്നത് കൊച്ചിൻ പോർട്ടിന്റെ അശാസ്ത്രീയമായ നിർമ്മിതിയിലേയ്ക്കും  വികസന പ്രവർത്തനങ്ങളിലേയ്ക്കുമാണെങ്കിലും നിർഭാഗ്യവശാൽ നമ്മുടെ ശാസ്ത്രലോകം ഈ സത്യത്തിനു നേരെ കമണ്ണടയ്ക്കുകയാണുണ്ടായത്.

    വർഷങ്ങൾ നീണ്ട ചെല്ലാനത്തിന്റെ നിലവിളിയ്ക്ക് ചെറിയൊരു ശമനമുണ്ടാകുന്നത് 1980 ൽ കടൽഭിത്തിയും ഏതാനും പുലിമുട്ടുകളും സ്ഥാപിച്ചപ്പോഴാണ്. പക്ഷെ കാര്യങ്ങൾ അവിടം കൊണ്ടും അവസാനിച്ചില്ല. കാരണം കപ്പൽ ചാലിന്റെ ആഴം കൂട്ടുന്നതു തുടരുകയും കടൽഭിത്തിയുടേയും പുലിമുട്ടിന്റെയും അറ്റകുറ്റ പണികൾ ചെയ്യുന്നത് തൊണ്ണൂറുകളുടെ അന്ത്യത്തിൽ മുതൽ നിർത്തിവയ്ക്കുകയും ചെയ്തതോടെ കാര്യങ്ങൾ കൂടുതൽ വഷളായി തുടങ്ങി. സർക്കാർ അനാസ്ഥ മൂലം കൊച്ചിൻ പോർട്ടിന് തെക്കുവശത്ത് അന്ധകാരനഴി വരെയുള്ള പ്രദേശങ്ങളിൽ കായലിൽ നിന്നും എക്കൽ വന്നു ചേരുന്നതിനുള്ള ചാലുകളും പൊഴികളുമെല്ലാം അടഞ്ഞു പോവുക മാത്രമല്ല, ഏറ്റവും പ്രധാനമായ സെഡിമെൻറ്സ് സ്രോതസ്സായ പെരിയാറിൽ നിന്നും എത്തിച്ചേരുന്നവയാകട്ടെ കപ്പൽ ചാലിന്റെ തടസം മൂലം തെക്കേ തീരങ്ങളിലേയ്ക്ക് എത്താതെയുമായി. ഈ നിലയിൽ വേലിയിറക്ക സമയങ്ങളിലെ കപ്പൽ ചാലിലൂടെയുള്ള കുത്തൊഴുക്കും തീരക്കടലിലെ സ്വാഭാവികമായ വടക്കുനിന്നും തെക്കോട്ടുള്ള ഒഴുക്ക് അഥവാ വടനീരിന്റെ പ്രഭാവവും ഒരുമിച്ച് ചേർന്ന് കപ്പൽച്ചാലിനു തെക്ക് അന്ധകാരനഴി വരെ ഒരു ചുഴിയായി രൂപം കൊള്ളുന്നു. ഈ പ്രതിഭാസം മൂലം ചെല്ലാനം-കൊച്ചി തീരക്കടലിന്റെ ഒഴുക്കിന്റെ ദിശ തെക്ക് നിന്നും വടക്കോട്ടായി ആയി മാറുകയാണുണ്ടായത്. ഏറ്റവും അപകടകരമായ ഈ ഒഴുക്കിനൊപ്പം തീരത്തെ മണ്ണും വടക്കോട്ടൊഴുകി പോവുകയും കപ്പൽച്ചാലിൽ പതിക്കുന്ന ആ മണ്ണ് കൊച്ചിൻ പോർട്ട് ഡ്രഡ്ജ് ചെയ്തെടുത്ത് പുറംകടലിൽ കൊണ്ടുപോയി തള്ളുകയുമാണ് ചെയ്യുന്നത്. . 365 ദിവസങ്ങളും 24 മണിക്കൂറും തുടരുന്ന ഈ ഡ്രഡ്ജിങ്ങും ഒഴുക്കും മൂലം കടുത്ത തീരശോഷണമാണ് ചെല്ലാനം-കൊച്ചി തീരം നേരിടുന്നത്. ഇതിനോടകം ഒന്നര കിലോമീറ്റർ തീരം കടലിനടിയിലായി കഴിഞ്ഞു. കടലിൽ കിടക്കുന്ന ഭൂമിയ്ക്ക് പലരും ഇന്നും കരമടയ്ക്കുന്നു. 

    എന്തുകൊണ്ട് ഈ അനാസ്ഥ 

    തീരദേശവാസികളോടുള്ള ഭരണകൂടത്തിന്റെ അനാസ്ഥയ്ക്ക് ആ നാടിനോളം തന്നെ പഴക്കമുണ്ട്. തീരദേശവാസികളോടുള്ള പൊതുസമൂഹത്തിന്റെ അവഗണന നിറഞ്ഞ കാഴ്ചപ്പാടിനെതിരെ ധാരാളം ചർച്ചകൾ നടക്കുന്നുണ്ട്. എന്നാൽ അത്തരമൊരു കാഴ്ചപ്പാടിലേയ്ക്ക് പൊതുസമൂഹത്തെ എത്തിക്കുന്നതിൽ പ്രധാന പങ്ക് വഹിച്ച ഭരണകൂടസംവിധാനങ്ങൾക്ക് നേരെ ആരുടേയും ചൂണ്ടുവിരൽ ഉയരുന്നില്ല എന്നതാണ് വാസ്തവം. ഇപ്പോഴും വെള്ളവും വെളിച്ചവും വഴിയുമില്ലാത്ത ഒരിടം കൊച്ചി നിയോജക മണ്ഡലത്തിലുണ്ടെന്ന് പറഞ്ഞാൽ ആരെങ്കിലും വിശ്വസിക്കുമോ ? എന്നാൽ അതാണ് യാഥാർഥ്യം. ചെല്ലാനം-കൊച്ചി ജനകീയവേദി സമരമാരംഭിക്കുകയും തുടർന്നുണ്ടായ അതിന്റെ പ്രവർത്തനഫലമായാണ് അവിടുത്തെ ചില പ്രദേശങ്ങളിൽ വെളിച്ചം വീണത്, അഥവാ വഴി തെളിക്കുന്നതിനുള്ള ശ്രമങ്ങൾ പഞ്ചായത്ത് ആരംഭിച്ചത്. അവഗണനയും പ്രതികാരമനോഭാവവും മാത്രമാണ് അവിടുത്തെ ജനങ്ങളോട് പഞ്ചായത്ത് തലം മുതൽ അധികാരികൾ പുലർത്തിപ്പോരുന്നത്. ഇന്നും കൂടുതൽ പ്രദേശങ്ങളിലും കുടിവെള്ളം ലഭ്യമല്ല. മൊത്തത്തിൽ തീരദേശവാസികളോടുള്ള അവഗണനയ്ക്ക് പുറമെ മറ്റൊരു കാരണം കൂടി ചെല്ലാനത്തിന്റെ കാര്യത്തിൽ നമുക്ക് കണ്ടെത്താൻ കഴിയും. 2016 ൽ സർക്കാർ മുന്നോട്ട് വച്ചിട്ടുള്ള ചില പദ്ധതികളുടെ പ്രോജക്ട് റിപ്പോർട്ടിലേയ്ക്ക് അത് വിരൽ ചൂണ്ടും. 
    2007 ൽ അന്നത്തെ പള്ളുരുത്തി(ചെല്ലാനം കൂടി ഉൾപ്പെട്ടിരുന്ന) എം.എൽ.എ ആയിരുന്ന ദിനേശ്‌മണി കൊച്ചിൻ പോർട്ടിനെയും സർക്കാരിനേയും പ്രതി ചേർത്ത് ഹൈക്കോടതിയിൽ ഒരു കേസ് ഫയൽ ചെയ്തിരുന്നു. അന്ന് കൊച്ചിൻ പോർട്ടിനെതിരെ നിശിതമായ വിമർശനങ്ങൾ ഉന്നയിച്ചിരുന്ന ദിനേശ് മണിയുടെ ഈ കേസ് വിധിയാകുന്നത് 2020 ലാണ്. സർക്കാർ ചെല്ലാനത്ത് നടത്തിയിട്ടുള്ള ചില പ്രതിരോധ പ്രവർത്തനങ്ങൾ പറഞ്ഞുകൊണ്ട് കേസ് അവസാനിപ്പിക്കുകയായിരുന്നു. കൊച്ചിൻ പോർട്ടിന്റെ പേര് പോലും എവിടെയും ആരും പരാമർശിച്ചില്ല. ദിനേശ് മണിക്കും പരാതിയില്ല. അതെന്തുകൊണ്ടാവും ? തീർച്ചയായും ഒരു നെയ്‌ത്തേങ്ങ ഈ വർഷങ്ങൾക്കിടയിൽ വന്നുചേർന്നിട്ടുണ്ട്. അതെന്താണെന്ന് നോക്കാം.
             2016 ൽ കേന്ദ്രസർക്കാർ വിഭാവനം ചെയ്ത സാഗർമാല എന്നൊരു പദ്ധതിയുണ്ട്. ഇന്ത്യയിലെ പോർട്ട് നവീകരണം, കമ്മ്യൂണിറ്റി വികസനം, പോർട്ട് അനുബന്ധ വികസനം, തീരദേശ ഹൈവേ എന്നീ നാല് മേഖലകളിലായി വൻ പദ്ധതികളാണ് ഇതിൽ ഉൾക്കൊള്ളിച്ചിരിക്കുന്നത്. അതിൽ കൊച്ചിൻ പോർട്ടിന് വേണ്ടി മാത്രം കേന്ദ്രസർക്കാർ ഒരു മാസ്റ്റർ പ്ലാൻ തയ്യാറാക്കിയിട്ടുണ്ട്. പോർട്ട് കണക്റ്റിവിറ്റി വികസിപ്പിക്കൽ, പോർട്ടിനോടനുബന്ധിച്ച് ലോജിസ്റ്റിക് പാർക്കുകൾ പ്രത്യേക സാമ്പത്തിക മേഖല, വെല്ലിങ്‌ടൺ ഐലൻഡ് കേന്ദ്രീകരിച്ചുള്ള പോർട്ട് സിറ്റി വികസനം, കൊച്ചി-മംഗലാപുരം, കൊച്ചി-ബാംഗ്ലൂർ വ്യവസായ ഇടനാഴിയുടെ പോർട്ടിനെ ബന്ധിപ്പിച്ചു കൊണ്ടുള്ള വികസനപദ്ധതികൾ എന്നിവയടങ്ങുന്നതാണ് ആ മാസ്റ്റർപ്ലാൻ. ഇത്രയും ബൃഹത്തായ ഒരു പദ്ധതി പോർട്ടിനെ കേന്ദ്രീകരിച്ചു നടപ്പിലാക്കാൻ പോകുമ്പോൾ ഭരണപക്ഷമായാലും പ്രതിപക്ഷമായാലും പിന്നെ അതിനെതിരെ ശബ്ദിക്കുന്നതെങ്ങിനെ ? കിട്ടാനുള്ള വിഹിതം വാങ്ങി മിണ്ടാതെ ഒരിടത്തിരിക്കലാവും ഉചിതം. സി.പി.എമ്മും യു.ഡി.എഫും മാത്രമല്ല, അവയെ താങ്ങി നിൽക്കുന്നവരും അവസരവാദികളായ സാമൂഹ്യ-രാഷ്ട്രീയ പ്രവർത്തകരും ശാസ്ത്രജ്ഞരുമടങ്ങുന്ന സമൂഹം അതുകൊണ്ട് പോർട്ടിനെതിരെ നിശ്ശബ്ദരാവും. അതാണ് നിലവിൽ സംഭവിക്കുന്നതും. 
    ഈ വിവരങ്ങളെല്ലാം ജനകീയവേദിയുടെ പഠനത്തിന് വേണ്ടി നടത്തിയ അന്വേഷണങ്ങളിൽ നിന്നും ലഭിച്ച വസ്തുതകളാണ്(ആർക്കും പരിശോധിക്കാൻ പാകത്തിൽ ഇന്റർനെറ്റിൽ അവ ലഭ്യമാണ്). പദ്ധതികളെ കുറിച്ച് നിലവിൽ സർക്കാർ സംവിധാനങ്ങൾ സുതാര്യമായി ഒന്നും തന്നെ പറയുന്നില്ല. വല്ലാത്ത ഒളിച്ചുകളിയിലൂടെ കാര്യങ്ങൾ നടപ്പാക്കിയെടുക്കാനാണ് അവർ ശ്രമിക്കുന്നത്. കഴിഞ്ഞ നിയമസഭാ തെരഞ്ഞെടുപ്പിൽ എൽ.ഡി.എഫ് തങ്ങളുടെ പ്രകടന പത്രികയിൽ ലോജിസ്റ്റിക് പാർക്ക് നിർമ്മിക്കുമെന്നും യു.ഡി.എഫ് തങ്ങളുടെ പത്രികയിൽ പോർട്ട് കേന്ദ്രീകരിച്ചുള്ള പ്രത്യേക സാമ്പത്തിക മേഖല നടപ്പാക്കുമെന്നും പറയുന്നുണ്ട്. വാസ്തവത്തിൽ ഇത് കേന്ദ്രം ഭരിക്കുന്ന എൻ.ഡി.എ സർക്കാർ രൂപകൽപ്പന ചെയ്ത സാഗർമാല പദ്ധതിയല്ലാതെ മറ്റൊന്നുമല്ല. ജനങ്ങളോടുള്ള അവഗണനയിൽ ഈ മൂന്നു കക്ഷികളുടെയും അസമാനമായ ഐക്യം തിരിച്ചറിഞ്ഞ ചെല്ലാനം-കൊച്ചി തീരത്തെ ജനത കേരളം കണ്ട ഏറ്റവും മികച്ച രാഷ്ട്രീയസമരങ്ങളിലൊന്ന് തെരഞ്ഞെടുപ്പുകാലത്ത് നടപ്പിലാക്കി. ഇലക്ഷൻ ബഹിഷ്കരണ ക്യാമ്പയിൻ സംഘടിപ്പിച്ചുകൊണ്ട് അവർ നിയമസഭാ തെരഞ്ഞെടുപ്പിൽ സമ്മതിദാനാവകാശം രേഖപ്പെടുത്തുന്നില്ലെന്ന് തീരുമാനമെടുത്തു. നിരന്തരമുള്ള അവഗണനയ്‌ക്കെതിരെ ജാഗ്രതയുള്ളൊരു സമൂഹമായി തങ്ങൾ മാറിക്കഴിഞ്ഞുവെന്ന ഒരു പ്രഖ്യാപനമായിരുന്നു അത്. 
    

പുനർഗേഹം അഥവാ സർക്കാർ സ്‌പോൺസേർഡ് വംശഹത്യ 

    പേര് മറച്ചു വച്ചുകൊണ്ട് 2019 മുതൽ തീരദേശത്ത് സർക്കാർ നടപ്പാക്കാൻ ശ്രമിക്കുന്ന പുനർഗേഹമെന്ന പദ്ധതിയെക്കുറിച്ചു കൂടി നമ്മൾ മനസിലാക്കേണ്ടതുണ്ട്. ഇതൊരു പുനരധിവാസ പദ്ധതിയായാണ് ആ പേര് പോലും പറയാൻ മടിക്കുന്ന ആളുകളാൽ ഇന്ന് അറിയപ്പെടുന്നത്. 2019 ന്റെ തുടക്കത്തിൽ തീരദേശത്ത് കാണപ്പെട്ട ചില ആളുകൾ സെൻസസിനൊക്കെ വരുന്ന പോലെ വന്ന് ആളുകളുടെ ജീവിതസാഹചര്യങ്ങളെക്കുറിച്ചൊക്കെ ചോദിച്ചു മനസിലാക്കി ഒടുവിൽ 10 ലക്ഷം രൂപ കിട്ടിയാൽ മാറാൻ തയ്യാറാണോ എന്നൊരു ചോദ്യവും ചോദിച്ചു മടങ്ങിയിരുന്നു. ഒരഭിപ്രായ സർവ്വേ. വളരെ നിഷ്കളങ്കമായി സാമൂഹ്യസേവകരെന്ന് തോന്നിപ്പിക്കും മട്ട് വരുന്ന ഇവർ ഒരു സർക്കാർ പദ്ധതിയുടെ നടത്തിപ്പുകാരാണ് എന്നതാണ് വാസ്തവം. ഇങ്ങനെ ചില പേരും അഡ്രെസും ശേഖരിച്ച് കൊണ്ടാണ് ചെല്ലാനം-കൊച്ചി തീരത്തെ പുനർഗേഹ ലിസ്റ്റ് തയ്യാറാക്കിയിട്ടുള്ളത്. 
    ഇനി എന്താണീ പുനർഗേഹം എന്ന് നോക്കാം. തീരദേശത്ത് വേലിയേറ്റ രേഖയിൽ നിന്ന് 50 മീറ്റർ പരിധിയ്ക്കുള്ളിൽ താമസിക്കുന്ന ആളുകളെ അവിടെ നിന്നും മാറ്റി പാർപ്പിക്കുന്നതിനുള്ള പദ്ധതിയാണിത്. 10 ലക്ഷം രൂപയാണ് അവർക്ക് മാറി താമസിക്കുന്നതിനായി സർക്കാർ നൽകുന്നത്. അതിൽ സ്ഥലത്തിന്റെ വില, രെജിസ്ട്രേഷൻ, സ്റ്റാമ്പ് ഡ്യൂട്ടി, എഴുത്തുകൂലി എന്നിവയുൾപ്പെടെ 6 ലക്ഷം രൂപയും വീട് പണിയ്ക്കായി അത് പൂർത്തിയാകുന്ന മുറയ്ക്ക് 3 ഗഡുക്കളായി 4 ലക്ഷം രൂപയും സർക്കാർ കൊടുക്കുന്നു. ഒരു വീട്ടിൽ എത്ര അംഗങ്ങളുണ്ട്, അവർക്കെത്ര സെന്റ് സ്ഥലമുണ്ട് തുടങ്ങിയ യാതൊരു വിധ പഠനങ്ങളുടേയും അടിസ്ഥാനത്തിലല്ല ഈ 10 ലക്ഷം രൂപ സർക്കാർ നിശ്ചയിക്കുന്നത്. ഏതൊരു സാധാരണക്കാരായ മനുഷ്യരേയും പോലെ ഒരായുസ്സിന്റെ സമ്പാദ്യമാണ് തീരദേശവാസിയ്ക്കും അവരുടെ സ്വന്തം വീട്. ആ സ്വപ്നങ്ങളെല്ലാം ഇന്നത്തെ ജീവിതച്ചെലവ് വച്ച് നോക്കുമ്പോൾ വെറും 4 ലക്ഷം രൂപയിൽ പരിമിതപ്പെടുത്തണമെന്ന് പറയുന്ന സർക്കാരിന്റെയും അവരെ പിന്തുണയ്ക്കുന്നവരുടേയും തീരദേശവാസികളെക്കുറിച്ചുള്ള സങ്കല്പമാണ് നഗ്നമാക്കപ്പെടുന്നത്. 10 പേരടങ്ങുന്ന കുടുംബത്തെ വരെ നിങ്ങൾക്കവിടെ കണ്ടെത്താൻ കഴിയും. 4 പേരടങ്ങുന്ന ഒരു കുടുംബത്തിന് താമസിക്കാൻ യു എൻ അംഗീകരിച്ചിട്ടുള്ള അന്തർദേശീയ നിലവാരമെന്ന് പറയുന്നത് 650 സ്ക്വയർ ഫീറ്റിൽ കുറയാത്ത വീട്  ആണ്.  
    പദ്ധതി സ്വീകരിക്കുന്ന ആളുകൾ തീരദേശത്തെ സ്വന്തം ഭൂമി(അതെത്ര വലുതോ ചെറുതോ ആയാലും)യിൽ ഇനിമേൽ യാതൊരു നിർമ്മാണ പ്രവർത്തനങ്ങളും നടത്തുകയില്ല എന്ന് ഫിഷറീസ് വകുപ്പുമായി കരാറിൽ ഏർപ്പെട്ട് സ്വന്തം ഭൂമി പരിത്യജിക്കണമെന്നാണ് പറയുന്നത്. ഇനി 12 മാസത്തിനുള്ളിൽ വീടുപണി പൂർത്തിയാക്കാൻ കഴിഞ്ഞില്ലെങ്കിൽ അതുവരെ ലഭിച്ച തുക 18 % പലിശയടക്കം സർക്കാരിന് തിരിച്ചു കൊടുക്കണം. വീട് വച്ച് താമസിച്ചാൽ 12 വർഷത്തേയ്ക്ക് യാതൊരുവിധ ക്രയവിക്രയങ്ങളും അതുപയോഗിച്ച് ചെയ്യാനുമാവില്ല. സ്വന്തം വീട് എന്നത് മനുഷ്യനെ സംബന്ധിച്ച് ഒരു ആസ്തി കൂടിയാണ് എന്നിരിക്കെ മത്സ്യത്തൊഴിലാളികളെ എക്കാലത്തേക്കും അഭയാർത്ഥികളാക്കി മാറ്റി തീർക്കുകയും നിലവിലുള്ള ഭൂരാഹിത്യത്തെ ഒന്നുകൂടി വർദ്ധിപ്പിക്കുകയുമാണ് ഈ പദ്ധതി നടപ്പാക്കലിലൂടെ ചെയ്യുന്നത്. 
    തീരദേശത്ത് അധിവസിക്കുന്നവരിൽ ഭൂരിഭാഗവും മൽസ്യതൊഴിലാളികളാണ് എന്നിരിക്കെ നിലവിലെ ഭൂലഭ്യതയനുസരിച്ച് തീരദേശത്തിനടുത്ത് അവർക്ക് ഭൂമി ലഭിക്കാൻ പോകുന്നില്ല. കടൽത്തീരങ്ങളിൽ താമസിച്ച് കടലിന്റെ സ്വഭാവമറിഞ്ഞ് കടലിൽ പണിക്കു പോകുന്ന ആളുകളാണ് മത്സ്യ തൊഴിലാളികൾ. അവരെ ദൂരദേശത്തേയ്ക്ക് പറിച്ചു നടുമ്പോൾ ഈ കടലറിവുകളിൽ നിന്ന് മാത്രമല്ല, പരമ്പരാഗതമായി വളരെ സമർത്ഥമായി ചെയ്തുപോരുന്ന ഒരു തൊഴിലിൽ നിന്നുകൂടിയാണ് അവരെ പറിച്ചു മാറ്റുന്നത്. മറ്റേതോ ദൂരദേശത്ത് തങ്ങൾക്ക് നൈപുണ്യമില്ലാത്ത ഏതോ ജോലിയിലേർപ്പെട്ട് തൊഴിൽപരമായും പ്രാദേശികമായും ഒരു രണ്ടാംകിട സ്ഥാനം വഹിക്കുന്നവരായി തീരാൻ അവർ നിർബന്ധിതരാവുന്നു.   
      1948 ലെ വംശഹത്യാ വിരുദ്ധ കൺവെൻഷന്റെ നിർവചനമനുസരിച്ച് ഏതെങ്കിലും മത, വംശ, ഗോത്ര വിഭാഗങ്ങളെ നശിപ്പിക്കുക എന്ന ഉദ്ദേശത്തോടെ മാനസികവും ശാരീരികവുമായ ആഘാതങ്ങൾ ഏൽപ്പിക്കുന്നതും അത്തരം വിഭാഗങ്ങളുടെ ഭൗതികമായ നിലനിൽപ്പിനെ അപകടപ്പെടുത്തുന്ന വിധത്തിലുള്ള ജീവിത സാഹചര്യങ്ങൾ അവരിൽ അടിച്ചേൽപ്പിക്കുന്നതും വംശഹത്യയാണ്. അതുകൊണ്ടു തന്നെ ചെല്ലാനത്ത് ഇന്ന് നടക്കുന്നത് പച്ചയായ സർക്കാർ സ്‌പോൺസേർഡ് വംശഹത്യയാണെന്ന് നമുക്ക് പറയാൻ കഴിയും. മൽസ്യത്തൊഴിലാളികളെന്ന വിഭാഗത്തെ തന്നെ ഇല്ലായ്മ ചെയ്യുന്നതിനുള്ള ഗൂഢമായ നീക്കമാണിതെന്ന് സംശയിക്കേണ്ടിയിരിക്കുന്നു. 
    മുകളിൽ പരാമർശിച്ച പദ്ധതികളും നിലവിൽ ഒരു തീരദേശപാത ഉണ്ടായിട്ട് കൂടി തീരദേശഹൈവേയ്ക്ക് വേണ്ടിയുള്ള സ്വരുക്കൂട്ടലുകളുമെല്ലാം ഇതാണ് വെളിവാക്കുന്നത്. അദാനിമാർക്കും അംബാനിമാർക്കും കേരളത്തിന്റെ തീരദേശം തീറെഴുതി കൊടുക്കുന്നതിനുള്ള വാറോലകളാണ് അണിയറയിൽ ഒരുങ്ങുന്നതെല്ലാം.  എല്ലാം പെർഫെക്റ്റ് പ്ലാനിങ് ആണ്. മേലുദ്ധരിച്ച പദ്ധതികൾ നടപ്പാക്കണമെങ്കിൽ ചെല്ലാനമെന്ന ഭൂപ്രദേശം അത്യാവശ്യമാണ്. അവിടെ അധിവസിക്കുന്നവരെ ഒഴിവാക്കിയാൽ വളരെയെളുപ്പം അവ നടപ്പിലാക്കാം. എല്ലാം മണ്ണും പണവും കടലുമെന്ന അനുപാതത്തിലാണ് നോക്കുന്നത്. 1500 കോടിയുടെ വികസനപ്രവർത്തനങ്ങൾ തീരദേശത്ത് നടത്തുമ്പോൾ ഇത്ര വർഷത്തിനുള്ളിൽ ഇന്ന മാർഗ്ഗങ്ങളിലൂടെ അതിലേറെ നിക്ഷേപം സംസ്ഥാനത്ത് കൊണ്ടുവരാൻ കഴിയും എന്നൊക്കെയാണ് കാര്യങ്ങൾ. അടിയന്തിരമായി സർക്കാർ വികസനത്തിന്റെ നിർവ്വചനം തിരുത്തിയെഴുതാൻ തയ്യാറാവുകയാണ് വേണ്ടത്. അതിൽ ജനങ്ങൾക്ക് കൂടി പങ്കാളിത്തമുണ്ടാകുന്ന രീതിയിൽ അതിനെ മാറ്റിയെഴുതണം. തീരദേശത്തെ വികസന പ്രവർത്തനങ്ങൾ തീരദേശവാസിയെ മാറ്റി നിർത്തിക്കൊണ്ടോ ആട്ടിപ്പായിച്ചു കൊണ്ടോ അല്ല നടപ്പാക്കേണ്ടത്.                 

സമരവും പരിഹാരവും 

     2019 ഒക്ടോബർ 28 നാണ് ചെല്ലാനത്തെ അമ്മമാർ 74 വയസുള്ള മറിയാമ്മ ജോർജ്ജ് കുരിശിങ്കലിന്റെ നേതൃത്വത്തിൽ ചെല്ലാനം ജനകീയവേദിയെന്ന സമരസംഘം രൂപീകരിച്ച് അനിശ്ചിതകാല റിലേ നിരാഹാരസമരം ആരംഭിച്ചത്. യുദ്ധകാലാടിസ്ഥാനത്തിൽ കടൽകയറ്റപ്രശ്നം പരിഹരിക്കുക, തോടുകളിൽ നീരൊഴുക്ക് സുഗമമാക്കാൻ നടപടി സ്വീകരിക്കുക, കുടിയൊഴിപ്പിക്കലും പുനരധിവാസവുമല്ല തീരസുരക്ഷയാണ് വേണ്ടത്. എന്നീ മുദ്രാവാക്യങ്ങളുയർത്തിയാണ് അവർ സമരമാരംഭിച്ചത്. സർക്കാരിന്റെ മാത്രമല്ല, ശാസ്ത്രസമൂഹമടങ്ങുന്ന പൊതുസമൂഹത്തിന്റെയും കൂടി അവഗണനയ്‌ക്കെതിരെയാണ് ആദ്യമായി അവർക്ക് പോരാടേണ്ടിയിരുന്നത്. ഇത്ര മാത്രം ദുരന്തങ്ങൾ നേരിടുന്ന ഒരു കരയായിട്ട് കൂടി ചെല്ലാനം തീരത്തെക്കുറിച്ച് സവിശേഷമായൊരു പഠനം നടന്നിട്ടില്ല എന്നതാണ് വാസ്തവം.  തീരം സംരക്ഷിക്കണമെന്ന ആവശ്യവുമായി ചെല്ലുമ്പോൾ അധികാരികൾ നമ്മോട് ചോദിക്കുന്നത് 'നിങ്ങൾക്ക് ചൂണ്ടിക്കാണിക്കാൻ എന്തെങ്കിലും പഠനങ്ങളുണ്ടോ ? ചെല്ലാനത്ത് എന്ത് ചെയ്യുമെന്നറിയാതെ ഞങ്ങൾ പരിഭ്രാന്തരായിരിക്കുകയാണ്' എന്നാണ്. അവരുടെ പരിഭ്രാന്തി വർഷങ്ങൾ നീണ്ടിട്ടും മാറിയിട്ടില്ല. കാരണം തങ്ങളുടെ അവകാശ-അധികാര-ഉത്തരവാദിത്വങ്ങളെക്കുറിച്ചുള്ള ബോധ്യമില്ലായ്മയിൽ നിന്നുണ്ടാകുന്നതാണീ പരിഭ്രാന്തി. എന്നാൽ കടലറിവുള്ള മൽസ്യത്തൊഴിലാളികൾ പങ്കുവയ്ക്കുന്ന അറിവുകളെ പുച്ഛത്തോടെ തള്ളിക്കളയുകയുമാണിവർ ചെയ്യുന്നത്.    
    കടൽകയറ്റത്തിന് പരിഹാരമാർഗ്ഗങ്ങളെ കുറിച്ച് അനവധി നിർദ്ദേശങ്ങളാണ് വരുന്നത്. കണ്ടൽക്കാടുകൾ മുതൽ മരങ്ങൾ നട്ടു പിടിപ്പിക്കൽ വരെ ഉൾപ്പെടുമതിൽ. എന്നാൽ ഈ പരിഹാരമാർഗ്ഗങ്ങളൊക്കെയും ഓരോ തീരത്തിനും വ്യത്യസ്തമായിരിക്കും. ചെല്ലാനത്ത് കണ്ടൽ നടുക പോയിട്ട് കാലു കുത്താൻ പോലും ഒരടി മണ്ണ് ഇല്ലാത്ത തീരമാണത്. പിന്നെ എല്ലാവർക്കും വളരെയെളുപ്പം തീരം വിട്ടുപോകലാണ് പ്രതിവിധി എന്ന് പറയുകയാണ്. തീരം വിട്ടു പോകൽ ഒരു പ്രതിവിധിയേ അല്ല. അടുത്ത പ്രാവശ്യം കുറച്ചു കൂടി കിഴക്കോട്ട് മാറി കടലെടുക്കുമെന്നതല്ലാതെ. പക്ഷെ പരിഹാരമാർഗ്ഗമുണ്ട്. അത് നടത്തിയെടുക്കാവുന്നതുമാണ്. ആദ്യം അതിന് തീരക്കടലിന്റെ ആഴം കുറയണം. അതിന് തീരത്ത് മണ്ണ് വേണം. കൊച്ചിൻ പോർട്ട് കപ്പൽ ചാലിൽ നിന്നും ഡ്രഡ്ജ് ചെയ്തെടുത്ത് പുറംകടലിൽ കൊണ്ടുപോയി കളയുന്ന മണ്ണ് ചെല്ലാനം-കൊച്ചി തീരത്തടിക്കണം. അതിനുള്ള പാരിസ്ഥിതികാനുമതിയും കൊച്ചിൻ പോർട്ടിന് ലഭിച്ചിട്ടുള്ളതാണ്. തീരപുനർനിർമ്മാണത്തിന് മണ്ണ് തീരത്തടിച്ചാൽ മാത്രം പോരാ, അത് വീണ്ടും ഒഴുകി പോകാതിരിക്കാൻ വടക്ക് ഫോർട്ട് കൊച്ചി മുതൽ തെക്കേ ചെല്ലാനം വരെ നിശ്ചിത ദൂരപരിധിയിൽ പുലിമുട്ട് പാടം നിർമ്മിക്കണം. ചെല്ലാനം-കൊച്ചി തീരത്തെ കടൽകയറ്റം ശാശ്വതമായി പരിഹരിക്കപ്പെടണമെങ്കിൽ ഈ മാർഗ്ഗം അവലംബിക്കണം. അതിന് കോടികളുടെ അധികച്ചെലവൊന്നും വരുന്നില്ല. തീരുമാനമെടുക്കാനുള്ള രാഷ്ട്രീയമായ ഇച്ഛാശക്തിയാണ് വേണ്ടത്. അരികുവൽക്കരിക്കപ്പെട്ടവരോടൊപ്പം നിൽക്കാനുള്ള രാഷ്ട്രീയമായ കരുത്ത്. അതില്ലാത്ത കാലത്തോളം ഏത് സർക്കാർ അധികാരത്തിൽ വന്നാലും കടൽകയറ്റവും തുടരും. 

-------------------------------------------------------------------------------------------------------------------------1) 1972 ൽ കേരള എൻജിനീയറിങ് റീസേർച്ച് ഇൻസ്റ്റിറ്റ്യുട്ടിന്റെ കോസ്റ്റൽ എൻജിനീയറിങ് ഡിവിഷൻ ഡെപ്യൂട്ടി ഡയറക്റ്റർ ആയ മോണി എൻ.എസ്സിന്റെ പഠനം 

2) തെക്കുപടിഞ്ഞാറൻ തീരത്തെ മണ്ണൊലിപ്പ് ഹോട്സ്പോട്ടുകളെക്കുറിച്ചുള്ള പഠനം 2015

3) വി ടി സെബാസ്റ്റ്യൻ ചെല്ലാനം ജനകീയവേദിയ്ക്ക് വേണ്ടി നടത്തിയ പഠനം  
4) അഡ്വ. തുഷാർ നിർമ്മൽ സാരഥി ചെല്ലാനം ജനകീയവേദിയ്ക്ക് വേണ്ടി നടത്തിയ പഠനം  
5) ധനകാര്യമന്ത്രി കെ എൻ ബാലഗോപാൽ ജൂൺ 4 , 2021 ന് അവതരിപ്പിച്ച പുതുക്കിയ ബജറ്റ് പ്രസംഗം.

ഭരണഘടനാ സ്ഥാപനങ്ങളുടെ ഫാസിസ്റ്റ് അട്ടിമറിക്കെതിരെ Nov.26 ഭരണഘടനാ ദിനത്തിൽ ജനകീയ പ്രതിഷേധം !!

ഗ്യാനേഷ് കുമാറിനെ പുറത്താക്കുക !!

എസ്.ഐ.ആർ റദ്ദാക്കുക !!

തെരഞ്ഞെടുപ്പ് കമ്മീഷണർമാരുടെ പ്രത്യേക പരിരക്ഷാ നിയമം റദ്ദാക്കുക!!

 

2026 നവംബർ 26

4 PM. പ്രതിഷേധ റാലിയും സമ്മേളനവും 

വെളി ഗ്രൗണ്ട് - വാസ്കോ ഡി ഗാമാ സ്‌ക്വയർ 

  
ഉദ്‌ഘാടനം അഡ്വ.കാളീശ്വരം രാജ്

മുഖ്യപ്രഭാഷണം സണ്ണി എം.കപിക്കാട്

Dr.ടി.എസ്.ശ്യാം കുമാർ , Dr.സ്മിത ബി കുമാർ, എൻ.സുബ്രമണ്യൻ, സി.ആർ.നീലകണ്ഠൻ തുടങ്ങിയവർ സംസാരിക്കുന്നു.   

 

പ്രിയ സുഹൃത്തേ,

 അടുത്ത തെരഞ്ഞെടുപ്പിൽ നിങ്ങളുടെ വോട്ട് എണ്ണപ്പെടുമെന്നു നിങ്ങൾക്ക് ഉറപ്പുണ്ടോ?

ഏതാനും ദിവസങ്ങൾക്കു മുൻപ് റിപ്പോർട്ടേഴ്‌സ് കളക്ടീവ് എന്ന പത്രപ്രവർത്തരുടെ കൂട്ടായ്മ തെരഞ്ഞെടുപ്പ് കമ്മീഷൻ്റെ രേഖകൾ പരിശോധിച്ച് കൊണ്ട് തയ്യാറാക്കിയ ഒരു റിപ്പോർട്ട് പുറത്തു വിട്ടിരുന്നു. അത് പ്രകാരം കഴിഞ്ഞ ലോക്സഭാ തെരഞ്ഞെടുപ്പിൽ മഹാരാഷ്ട്ര, ഹരിയാന, ജമ്മു കാശ്മീർ എന്നിവിടങ്ങളിലെ 32 സീറ്റുകളിൽ ആകെ പോൾ ചെയ്ത വോട്ടും ആകെ എണ്ണിയ വോട്ടും തമ്മിൽ വ്യത്യാസമുള്ളതായി കണ്ടെത്തിയിരിക്കുന്നു. 19 സീറ്റുകളിൽ ആകെ വോട്ട് ചെയ്യാൻ എത്തിയ വോട്ടർമാരുടെ കണക്ക് ലഭ്യമല്ല എന്നും റിപ്പോർട്ട് പറയുന്നു.

2024 ഒക്ടോബറിൽ നടന്ന തെരഞ്ഞെടുപ്പിൽ ഹരിയാനയിലെ ബാദ്കൽ എന്ന മണ്ഡലത്തിൽ ആകെ 3.32 ലക്ഷം വോട്ടുകൾ പോൾ ചെയ്തതായാണ് കണക്ക്. എന്നാൽ ഇവിടെ എണ്ണിയതാകട്ടെ ആകെ 1.60 വോട്ടുകൾ മാത്രം.!!

നമ്മുടെ നാട്ടിൽ നടക്കുന്ന തെരഞ്ഞെടുപ്പ് പ്രക്രിയയുടെ വിശ്വാസ്യത എത്ര മാത്രം ഇടിഞ്ഞിരിക്കുന്നു എന്ന് കാണിക്കുന്നതാണ് ഈ സംഭവം.

തെരഞ്ഞെടുപ്പ് കമ്മീഷന്റെ ജനാധിപത്യ വിരുദ്ധ പ്രവർത്തനങ്ങളെ സംബന്ധിച്ച് പുറത്ത് വന്നിട്ടുള്ള ഏറ്റവും ഒടുവിലത്തെ റിപ്പോർട്ടാണ് മേല്പറഞ്ഞത്. 2014 ൽ ബിജെപി നേതൃത്വം നൽകുന്ന എൻഡിഎ സഖ്യം അധികാരത്തിൽ വന്നതിനു ശേഷം തെരഞ്ഞെടുപ്പ് കമ്മീഷൻ ഉൾപ്പടെയുള്ള ഭരണഘടനാ സ്ഥാപനങ്ങളെയും മറ്റ് സർക്കാർ വകുപ്പുകളെയും തങ്ങളുടെ ഫാസിസ്റ്റ് അജണ്ടക്ക് ഇണങ്ങും വിധമുള്ള ഉപകരണങ്ങളാക്കി മാറ്റുന്നതിനുള്ള ശ്രമങ്ങൾ നടത്തി വരികയാണ്. തങ്ങൾക്ക് വിധേയരായ ഉദ്യോഗസ്ഥരെ നിയമിക്കുകയും തങ്ങളുടെ അധികാരം നിലനിര്ത്താൻ കഴിയും വിധമുള്ള പദ്ധതികൾ നടപ്പിലാക്കുകയുമാണ് മോഡി സർക്കാർ. തെരഞ്ഞെടുപ്പ് കമ്മീഷൻ നടപ്പിലാക്കിയ പ്രത്യേക തീവ്ര വോട്ടർപട്ടിക പരിശോധന(SIR) ഇത്തരം ഒരു നടപടിയാണ്. 

വോട്ടർ പട്ടിക പ്രത്യേക തീവ്ര പരിശോധന (SIR) എന്നപേരിൽ 13.5 കോടി വോട്ടർമാരെയാണ് ഇതുവരെ 31 സംസ്ഥാനങ്ങളുടെയും കേന്ദ്ര ഭരണ പ്രദേശങ്ങളിലെയും വോട്ടർ പട്ടികയിൽ നിന്നും ഒഴിവാക്കിയത്. ആകെ വോട്ടർമാരിൽ 14 ശതമാനം വരും ഇത്. തൊഴിലാളികളും, കൂലിവേലക്കാരും, മറ്റു സംസ്ഥാനങ്ങളിൽ ജോലിക്കായി പോയവരും, ഉൾപ്പെടുന്ന സാധാരണക്കാരാണ് ഇപ്രകാരം പുറത്താക്കപ്പെടുന്നവരിൽ മഹാഭൂരിപക്ഷവും. ചില കേന്ദ്രങ്ങളിൽ മുസ്ലിങ്ങളെയും ദളിതരെയും പ്രത്യേകമായി ലക്‌ഷ്യം വച്ചുകൊണ്ട് ഒഴിവാക്കിയതായി റിപ്പോർട്ടുകൾ പുറത്തു വന്നിട്ടുണ്ട്. ഫലത്തിൽ RSS ന്റെ ഹിന്ദു രാഷ്ട്ര സ്ഥാപനമെന്ന ലക്ഷ്യം നേടുന്നതിനു വേണ്ടിയാണ് ഇലക്ഷൻ കമ്മീഷൻ പ്രവർത്തിക്കുന്നത്. വോട്ടർ പട്ടികയുടെ ശുദ്ധീകരണമാണ് നടക്കുന്നത് എന്ന കേന്ദ്ര ആഭ്യന്തര മന്ത്രി അമിത് ഷാ യുടെ വാദം ഇതിനു അടിവരയിടുന്നു. 

പ്രായപൂർത്തിയായ പൗരന്മാരെ വോട്ടർ പട്ടികയിൽ ഉൾപ്പെടുത്തുക എന്നത് തെരഞ്ഞെടുപ്പ് കമ്മീഷന്റെ ഉത്തരവാദിത്തമാണ്. എന്നാൽ SIR പോലുള്ള നടപടികളിലൂടെ വോട്ടർമാരാണെന്നു തെളിയിക്കേണ്ട ബാധ്യത പൗരന്മാരുടെ ചുമതലയാക്കി മാറ്റുകയാണ് തെരഞ്ഞെടുപ്പ് കമ്മീഷൻ ചെയ്യുന്നത്.

വോട്ടർപട്ടികയിൽ നിന്നും ഒഴിവാക്കപ്പെടുന്നവർക്ക് സർക്കാർ തലത്തിൽ നിന്നുള്ള ആനുകൂല്യങ്ങൾ നൽകില്ല എന്ന് ഇപ്പോൾ തന്നെ പശ്ചിമ ബംഗാളിലെ ബി.ജെ.പി. മുഖ്യമന്ത്രി പ്രഖ്യാപിച്ചു കഴിഞ്ഞു. വോട്ടർ പട്ടികയിൽ നിന്ന് ഒഴിവാക്കപ്പെട്ടവരുടെ പൗരത്വം പരിശോധിക്കാനുള്ള നടപടികൾക്കായി റിപ്പോർട് ചെയ്യുക എന്നതാണ് അടുത്തപടി. ഫലത്തിൽ വോട്ടർ പട്ടികയിൽ നിന്നുള്ള പേര് വെട്ടൽ പൗരത്വ നിഷേധത്തിലേക്കുള്ള വഴിയായി മാറുകയാണ്.

നിയമപരമായി ഇല്ലാത്ത അധികാരം ഉപയോഗിച്ചാണ് തെരഞ്ഞെടുപ്പ് കമ്മീഷൻ ഇത്തരം നടപടികൾ നടപ്പിലാക്കുന്നത്. പുതിയ വോട്ടർമാരെ ചേർക്കുന്നതിനുള്ള ഫോം 6 ൽ നിയമവിരുദ്ധമായി ഭേദഗതി ചെയ്തതാണ് ഒരു ഉദാഹരണം. നിയമമനുസരിച്ച് പാർലമെന്റിനു മാത്രമേ തെരഞ്ഞെടുപ്പ് ചട്ടങ്ങളിൽ ഭേദഗതി ചെയ്തു കൊണ്ട് ഫോം 6 ൽ മാറ്റം വരുത്താൻ കഴിയു. പ്രതിഷേധം ഉയർന്നപ്പോൾ സുപ്രീം കോടതി നിർദ്ദേശപ്രകാരമാണ് അപ്രകാരം ചെയ്തതെന്നായിരുന്നു തെരഞ്ഞെടുപ്പ് കമ്മീഷൻ വിശദീകരിച്ചത്. എന്നാൽ പിന്നീട് സുപ്രീം കോടതി തന്നെ തങ്ങൾ അപ്രകാരം നിർദേശം നൽകിയിട്ടില്ല എന്ന് വ്യക്തമാക്കുകയുണ്ടായി.

തെരഞ്ഞെടുപ്പ് കമ്മീഷന്റെ ഇത്തരം എല്ലാ പ്രവർത്തനങ്ങൾക്കും പരിരക്ഷ നൽകുന്ന നയമാണ് കേന്ദ്ര സർക്കാർ സ്വീകരിച്ചിട്ടുള്ളത്. സുപ്രീം കോടതി ചീഫ് ജസ്റ്റിസും പ്രധാനമന്ത്രിയും ലോക് സഭാ പ്രതിപക്ഷ നേതാവും ഉൾപ്പെടുന്ന സമിതിയായിരിക്കണം തെരഞ്ഞെടുപ്പ് കമ്മീഷണർമാരെ തെരഞ്ഞെടുക്കേണ്ടതെന്നു 2023 ൽ സുപ്രീം കോടതി വിധിച്ചിരുന്നു. എന്നാൽ പ്രധാനമന്ത്രിയും ഒരു കേന്ദ്രമന്ത്രിയും പ്രതിപക്ഷ നേതാവും ഉൾപ്പെടുന്ന സമിതിയെ തെരഞ്ഞെടുപ്പ് കമ്മീഷണർമാരെ നിയമിക്കുന്നതിനായി ചുമതലപ്പെടുത്തുന്ന നിയമം പാസാകുകയായിരുന്നു കേന്ദ്ര സർക്കാർ. ഇത് വഴി സുപ്രീം കോടതി വിധി അട്ടിമറിക്കപ്പെടുകയും തെരഞ്ഞെടുപ്പ് കമീഷണർമാരുടെ നിയമനത്തിൽ പരിപൂർണ്ണമായ അധികാരം കേന്ദ്ര സർക്കാരിന് ലഭിക്കുകയും ചെയ്തു. ഇതേ നിയമത്തിലൂടെ തെരഞ്ഞെടുപ്പ് കമ്മീഷണർമാർക്ക് നിയമ നടപടികളിൽ നിന്ന് പരിരക്ഷ നൽകുകയും ചെയ്തു. തെരഞ്ഞെടുപ്പ് കമ്മീഷൻ ഇപ്പോൾ മോഡി സർക്കാരിനും ആർ.എസ്.എസ്സിനും വേണ്ടി ചെയ്തു വരുന്ന ജനാധിപത്യ വിരുദ്ധവും നിയമവിരുദ്ധവുമായ നടപടികൾ ചോദ്യം ചെയ്യപ്പെടാതിരിക്കാനുള്ള സാഹചര്യം മുൻപേ തന്നെ ഒരുക്കപ്പെട്ടിരുന്നിരുന്നു എന്ന് സാരം. 

ഇപ്രകാരം ജനാധിപത്യ മൂല്യങ്ങളെയും ബോധത്തെയും അവഹേളിച്ചു കൊണ്ട് തെരഞ്ഞെടുപ്പ് കമ്മീഷനിൽ പിടിമുറുക്കിയിരിക്കുകയാണ് മോഡി സർക്കാർ. തെരഞ്ഞെടുപ്പ് കമ്മീഷനാകട്ടെ മോഡി സർക്കാരിന് അധികാര തുടർച്ച ഉറപ്പാക്കാനുള്ള ഉപകരണമായി പ്രവർത്തികുകയും ചെയ്യുന്നു. തെരഞ്ഞെടുപ്പ് കമ്മീഷനിലെ 2 കമ്മീഷണർമാരുടെ എതിർപ്പ് പോലും പരിഗണിക്കാതെയാണ് തെരഞ്ഞെടുപ്പ് കമ്മീഷൻ നടപടികൾ മുന്നോട്ട് പോകുന്നത് എന്നും റിപ്പോർട്ടുകൾ പുറത്ത് വന്നിരിക്കുന്നു.      

തെരഞ്ഞെടുപ്പ് കമ്മീഷന്റെ നീതിരഹിതമായ ഇത്തരം നടപടികൾക്കെതിരെ ശക്തമായ പ്രതിഷേധം രാജ്യവ്യാപകമായി ഉയർന്നു വന്നിരിക്കുകയാണ്. ചരിത്രപരമായ ഈ സമരത്തിൽ എല്ലാ ജനാധിപത്യ വിശ്വാസികളും അണി ചേരേണ്ടതുണ്ട്. 2026 നവംബർ 26 നു ഫോർട്ട് കൊച്ചിയിൽ വോട്ടർപട്ടിക അട്ടിമറിക്കെതിരെ ജനകീയ പ്രതിഷേധ കൂട്ടായ്മ സംഘടിപ്പിക്കുന്ന പ്രതിഷേധ റാലിയിലും സമ്മേളനത്തിലും പങ്കെടുത്തു കൊണ്ട് തെരഞ്ഞെടുപ്പ് കമ്മീഷൻ ഉൾപ്പെടെയുള്ള ഭരണഘടനാ സ്ഥാപനങ്ങളുടെ ഫാസിസ്റ്റ് അട്ടിമറിക്കെതിരെയും, വോട്ടർപട്ടിക അട്ടിമറിക്കെതിരെയുമുള്ള സമരത്തിൽ പങ്കു ചേരണമെന്ന് അഭ്യർത്ഥിക്കുന്നു.
 
                            അഭിവാദ്യങ്ങളോടെ

 
വോട്ടർപട്ടിക അട്ടിമറിക്കെതിരായ ജനകീയ പ്രതിഷേധ കൂട്ടായ്മ

കൺവീനർമാർ
ആസാദ്(9986771634), ഹാരിസ് അബു(9895155009), അഡ്വ. തുഷാർ നിർമൽ(9633027792) 
 
       

2026 ഓഗസ്റ്റ് 2, ഞായറാഴ്‌ച

നിവേദന to ജില്ലാ കളക്ടർ ഡിസംബർ 2024

ബഹുമാനപ്പെട്ട എറണാകുളം ജില്ലാ കളക്ടർ ശ്രീ എൻ.എസ്.കെ ഉമേഷ് IAS മുൻപാകെ ചെല്ലാനം-കൊച്ചി ജനകീയവേദിക്ക് വേണ്ടി വി.ടി സെബാസ്റ്റ്യൻ ബോധിപ്പിക്കുന്ന ഹർജി.


സർ,

      വിഷയം: ചെല്ലാനം-കൊച്ചി തീരത്തെ കടൽകയറ്റവും തീരശോഷണവും ശാശ്വതമായി പരിഹരിക്കുന്നത് സംബന്ധിച്ച്

       സൂചന : Regional Studies in Marine Science ജേർണലിൽ പ്രസിദ്ധീകരിച്ച പഠനം "An evidence-based study of spatiotemporal trends and hotspots of sea surge events in Kerala, India."


    മേൽ സൂചന പ്രകാരമുള്ള പഠനം ഈ നിവേദനത്തോടൊപ്പം ഹാജരാക്കുന്നു. ചെല്ലാനം-കൊച്ചി തീരം എത്തി നിൽക്കുന്ന ഗുരുതരമായ പാരിസ്ഥിതിക പ്രതിസന്ധി വെളിപ്പെടുത്തുന്നതാണ് മേൽ സൂചനയിൽ പ്രസ്താവിച്ചിട്ടുള്ള  ശാസ്ത്രീയ പഠനം. 2012 മുതൽ 2023 വരെയുള്ള പത്തുവർഷങ്ങളിൽ കേരള തീരത്തുണ്ടായ കടൽകയറ്റങ്ങളെ കുറിച്ച് പഠിച്ചു ത യാറാക്കിയതാണ്  പ്രസ്തുത ശാസ്ത്ര ലേഖനം.


പ്രസ്തുത പഠനം എത്തിച്ചേർന്ന ചില  പ്രധാന നിഗമനങ്ങളിലേക്ക് അങ്ങയുടെ ശ്രദ്ധ ക്ഷണിക്കുന്നു. അവ ഇപ്രകാരമാണ്.

1. അതിരൂക്ഷമായ കടൽകയറ്റം നേരിടുന്ന കേരള സംസ്ഥാനത്തെ പതിനൊന്നു ഹോട്ട് സ്പോട്ടുകളിൽ ഒന്നാണ് ചെല്ലാനം.  

2.കേരളത്തിൻ്റെ തീര പ്രദേശത്ത് 10 കി.മീ പ്രദേശത്ത് ഏറ്റവും കൂടുതൽ കടലാക്രമണം ഉണ്ടാകുന്ന ജില്ലയാണ് എറണാകുളം.

3.പഠന കാലയളവിലെ (2012-2023) കടലാക്രമണങ്ങളുടെ തോത് പരിശോധിക്കുമ്പോൾ 2018-2023 വരെയുള്ള കാലയളവിൽ കടലാക്രമണം ഏറ്റവും കൂടുതൽ ഉണ്ടായിട്ടുള്ളത് എറണാകുളം ജില്ലയിലാണ്. എറണാകുളം ജില്ലയിൽ പഠന കാലയളവിൻ്റെ രണ്ടാം പകുതിയിൽ ആദ്യ പകുതിയേക്കാൾ അഞ്ചിരട്ടിയായിട്ടാണ് കടലാക്രമണം വർദ്ധിച്ചിരിക്കുന്നത്.


 ചെല്ലാനം - കൊച്ചി തീരം സംരക്ഷിക്കുന്നതിനുള്ള നടപടികൾ എത്രയും പെട്ടെന്ന് നടപ്പിലാക്കേണ്ടുന്നതിൻ്റെ ഗൗരവം ബോധ്യപ്പെടുത്തുന്നതാണ് ഈ വസ്തുതകൾ. ചെല്ലാനം-കൊച്ചി തീരം നേരിടുന്ന കടൽകയറ്റവും തീരശോഷണവും  മനുഷ്യ നിർമ്മിതമാണ്. കൊച്ചിൻ പോർട്ടിൻ്റെ ഡ്രഡ്ജിങ് നടപടികളാണ്  ചെല്ലാനം-കൊച്ചി തീരത്തെ തീരശോഷണത്തിനും കടൽ കയറ്റത്തിനും പ്രധാന കാരണം. നഷ്ടമായ തീരം പുനർനിർമ്മിച്ചാൽ മാത്രമേ ചെല്ലാനം-കൊച്ചി തീരത്തെ കടൽകയറ്റം ശാസ്ത്രീയവും സമഗ്രവുമായി പരിഹരിക്കാൻ കഴിയൂ. ടെട്രാപോഡ് കടൽഭിത്തിയും പുലിമുട്ടുകളും നിർമ്മിക്കേണ്ടത് ചെല്ലാനം- കൊച്ചി തീരസംരക്ഷണത്തിന് അത്യാവശ്യമാണ്. അതോടൊപ്പം തീരം പുനർനിർമ്മിക്കുകയും ചെയ്യേണ്ടതുണ്ട്. കടൽഭിത്തി-പുലിമുട്ടുകളുടെ നിർമ്മാണം സാമ്പത്തിക കാരണങ്ങളാൽ അനന്തമായി നീണ്ടു പോകുന്ന സാഹചര്യത്തിൽ താൽക്കാലികമായി  കൊച്ചിൻ പോർട്ട് എല്ലാ ദിവസവും ഡ്രഡ്ജ് ചെയ്‌തെടുക്കുന്ന മണ്ണ് ഉപയോഗിച്ച് തീരം പുനർ നിർമ്മിക്കുകയും തീരം വീണ്ടും നഷ്ടമാകുന്നത് തടയാൻ ജിയോ ട്യൂബ് കൊണ്ടുള്ള പുലിമുട്ടുകൾ നിർമ്മിക്കുകയും ചെയ്‌താൽ അത് ചെല്ലാനം-കൊച്ചി തീരത്തെ ജനങ്ങൾക്ക് അടിയന്തിര ആശ്വാസമാകും.


കഴിഞ്ഞ ജൂലൈ 5 നു ചെല്ലാനം-കൊച്ചി ജനകീയവേദിയുടെ പ്രതിഷേധത്തെ തുടർന്ന് അങ്ങ് ചെല്ലാനം സന്ദർശിക്കുകയും തുടർന്ന് കൊച്ചിൻ പോർട്ടിൻ്റെ ചീഫ് എൻജിനിയറും  ചെല്ലാനം-കൊച്ചി ജനകീയവേദിയുടെ പ്രതിനിധികളും കൂടി പങ്കെടുത്ത ഒരു മീറ്റിംഗ് അങ്ങയുടെ ചേംബറിൽ വച്ച് കൂടുകയും ചെയ്തിരുന്നു. ചർച്ചയുടെ ഭാഗമായി അങ്ങ് കൊച്ചിൻ പോർട്ടിനോട് വിശദമായ റിപ്പോർട്ട് ആവശ്യപ്പെട്ടിരുന്നു.എന്നാൽ നാളിതുവരെ ഈ കാര്യത്തിൽ യാതൊരു നടപടിയും ഉണ്ടായിട്ടില്ല എന്നത് അത്യന്തം ഖേദകരമാണ്. കുറ്റകരവും നിഷേധാത്മകവുമായ സമീപനമാണ് ചെല്ലാനം-കൊച്ചി തീര സംരക്ഷണ കാര്യത്തിൽ കൊച്ചിൻ പോർട്ട് തുടരുന്നത്. തീരസംരക്ഷണ നടപടികൾ ഇനിയും വൈകിയാൽ ഗുരുതരമായ സ്ഥിതിയിലേക്കാവും കാര്യങ്ങൾ ചെന്നെത്തുക എന്നതാണ് സൂചനയിൽ പറയുന്ന ശാസ്ത്രീയ പഠനവും  മുന്നറിയിപ്പ് നൽകുന്നത്.


ഈ സാഹചര്യത്തിൽ ബഹുമാനപ്പെട്ട അങ്ങയുടെ ദയവുണ്ടായി കൊച്ചിൻ പോർട്ടിൽ നിന്നും മണ്ണ് ലഭ്യമാക്കി ചെല്ലാനം-കൊച്ചി തീരം പുനർ നിർമ്മിക്കുന്നതിനും പുലിമുട്ടുകളും കടൽഭിത്തിയും നിർമ്മിച്ച് തീരം സംരക്ഷിക്കുന്നതിനും വേണ്ടുന്ന അടിയന്തിര നടപടികൾ ഉണ്ടാകണമെന്ന് അപേക്ഷിക്കുന്നു.

                                         എന്ന് 19 ഡിസംബർ 2024

                                                                                         വി.ടി.സെബാസ്റ്റ്യൻ

                                                                                          ജനറൽ കൺവീനർ

                                                                             ചെല്ലാനം-കൊച്ചി ജനകീയവേദി

സായാഹ്‌ന ധർണ്ണ - കാട്ടിപ്പറമ്പ് - മെയ് 30 -2026

 

 പ്രിയ സുഹൃത്തേ,


വീണ്ടും കടൽകയറ്റം ഉറപ്പായ ഒരു മഴക്കാലമാണ് വരാനിരിക്കുന്നത്. പുത്തൻ തോട് ബീച്ചിനു വടക്കോട്ട് ബീച്ച് റോഡ് വരെയുള്ള പ്രദേശങ്ങൾ ഈ വർഷവും കടൽകയറ്റ ഭീഷണിയിലാണ്. ചെല്ലാനം പഞ്ചായത്ത് അതിർത്തിവരെ ടെട്രാപ്പോഡ് കടൽഭിത്തി നിർമ്മിക്കുന്നതിന് 404 കോടി രൂപയുടെ പദ്ധതിക്ക് കഴിഞ്ഞ എൽഡിഎഫ് സർക്കാർ ഭരണാനുമതി നൽകിയിരുന്നു. നിയമസഭാ തെരഞ്ഞെടുപ്പ് പ്രഖ്യാപിക്കുന്നതിന് തൊട്ടു മുൻപ് പുത്തൻ തോട് ബീച്ചിൽ വച്ച് വളരെ ആഘോഷപൂർവ്വം മുഖ്യമന്ത്രിയായിരുന്ന പിണറായി വിജയൻ തന്നെ രണ്ടാംഘട്ട നിർമ്മാണപദ്ധതിയുടെ ഉദ്ഘാടനം നിർവ്വഹിക്കുകയും ചെയ്തു. എന്നാൽ നിർമ്മാണത്തിന് ആവശ്യമായ സാങ്കേതിക അനുമതി നൽകുകയോ പദ്ധതി നടപ്പിലാക്കാൻ ആവശ്യമായ ഉദ്യോഗസ്ഥരെ നിയമിക്കുകയോ,പണി ഏൽപ്പിക്കാൻ ഉദ്ദേശിച്ച ഊരാളുങ്കൽ ലേബർ കോൺട്രാക്ട് കോഓപ്പറേറ്റീവ് സൊസൈറ്റിയുമായി കരാർ ഉണ്ടാക്കുകയോ ചെയ്തിരുന്നില്ല. തെരഞ്ഞെടുപ്പ് പ്രഖ്യാപിക്കപ്പെട്ടതോടു കൂടി തെരഞ്ഞെടുപ്പ് പെരുമാറ്റ ചട്ടങ്ങൾ മാറിയതിനു ശേഷം മാത്രമേ ഈ കാര്യത്തിൽ തുടർനടപടി ഉണ്ടാകൂ എന്ന നിലപാടാണ് എൽഡിഎഫ് സർക്കാർ സ്വീകരിച്ചത്. അതോടു കൂടി തെരഞ്ഞെടുപ്പ് മുന്നിൽ കണ്ടു കൊണ്ടുള്ള ഒരു നാടകം മാത്രമായിരുന്നു രണ്ടാംഘട്ട കടൽഭിത്തി നിർമ്മാണപദ്ധതിയുടെ ഉദ്ഘാടനം എന്ന് വെളിവാക്കപ്പെട്ടു.

ഇന്നിപ്പോൾ തെരഞ്ഞെടുപ്പ് കഴിഞ്ഞിരിക്കുന്നു. 10 വർഷങ്ങൾക്ക് ശേഷം യുഡിഎഫ് സർക്കാർ അധികാരത്തിൽ വന്നിരിക്കുന്നു. എൽഡിഫ് സർക്കാർ പ്രഖ്യാപിച്ച രണ്ടാംഘട്ട കടൽഭിത്തി നിർമ്മാണത്തിന് എന്തു സംഭവിക്കും എന്നാ ആശങ്ക ജനങ്ങൾക്കുണ്ട്. ഇനിയും കടൽഭിത്തി നിർമ്മാണം നീണ്ടു പോകാതിരിക്കാൻ 
 നമുക്ക് ജാഗ്രത പുലർത്തേണ്ടതുണ്ട്.

 എൽഡിഎഫ് സർക്കാർ പ്രഖ്യാപിച്ച രണ്ടാംഘട്ട കടൽഭിത്തി നിർമ്മാണം യുദ്ധകാലാടിസ്ഥാനത്തിൽ നടപ്പിൽ വരുത്താൻ യുഡിഎഫ് സർക്കാർ തയ്യാറാകണം. ചെല്ലാനം പഞ്ചായത്ത് അതിർത്തി വരെയായി പ്രഖ്യാപിക്കപ്പെട്ട രണ്ടാം ഘട്ട പദ്ധതി ബീച്ച് റോഡ് വരെ നീട്ടി നടപ്പിലാക്കണം. കൊച്ചിൻ പോർട്ടിൽ നിന്നും മണ്ണ് ലഭ്യമാക്കി ചെല്ലാനം കൊച്ചി തീരം പുനഃനിർമ്മിക്കാൻ വേണ്ട നടപടിയെടുക്കണം. അതോടൊപ്പം ഈ മഴക്കാലത്ത് കടൽകയറ്റം പ്രതിരോധിക്കാൻ താൽക്കാലിക പ്രതിരോധ-സംരക്ഷണ നടപടികൾ എത്രയും പെട്ടെന്ന് പൂർത്തിയാക്കാൻ സർക്കാർ അടിയന്തിരമായി ഇടപെടണം.

ഈ കാര്യങ്ങളിൽ സർക്കാരിൻ്റെ ശ്രദ്ധ ക്ഷണിക്കുന്നതിനായി മെയ് 30 നു വൈകീട്ട് 4 മണിക്ക് കാട്ടിപ്പറമ്പിലെ ചെല്ലാനം-കൊച്ചി ജനകീയവേദിയുടെ സമരപ്പന്തലിൽ സംഘടിപ്പിക്കുന്ന സായാഹ്‌ന ധർണ്ണയിൽ മുഴുവൻ സുഹൃത്തുക്കളും പങ്കെടുക്കണമെന്ന് അഭ്യർത്ഥിക്കുന്നു.

വി.ടി.സെബാസ്റ്റ്യൻ
ജനറൽ കൺവീനർ
ചെല്ലാനം-കൊച്ചി ജനകീയവേദി  
9349249678

അഡ്വ.തുഷാർ നിർമ്മൽ സാരഥി
വർക്കിങ് ചെയർ പേഴ്‌സൺ
ചെല്ലാനം-കൊച്ചി ജനകീയവേദി  
9633027792
 
   

നിവേദനം കൊച്ചി എം എൽ എ മുഹമ്മദ് ഷിയാസിന് 27-05-2026

 

ബഹുമാനപ്പെട്ട കൊച്ചി എം എൽ എ ശ്രീ. മുഹമ്മദ് ഷിയാസ് മുൻപാകെ ചെല്ലാനം- കൊച്ചി ജനകീയവേദി ബോധിപ്പിക്കുന്ന നിവേദനം.


 സർ,
 വിഷയം: തീര ശോഷണവും കടൽകയറ്റവും രൂക്ഷമായ ചെല്ലാനം-കൊച്ചി തീരം സംരക്ഷി ക്കുന്നതിനുള്ള നടപടികൾക്കായി.

 
ചെല്ലാനം-കൊച്ചി തീരം നേരിടുന്ന അതിരൂക്ഷമായ കടൽകയറ്റവും തീരശോഷണവും ഈ തീരത്തെ ജനജീവിതം ദുരിതമയമാക്കിയിരിക്കുന്ന കാര്യം അങ്ങേക്ക് അറിവുള്ളതാണല്ലോ. പതി റ്റാണ്ടുകളായി ചെല്ലാനം-കൊച്ചി തീരജനത നേരിടുന്ന ഈ പ്രശ്നത്തിനു ഇന്നേവരെ ശാശ്വതമായ ഒ രു പരിഹാരം ആയിട്ടില്ല എന്നത് ദുഃഖകരമാണ്‌.

ചെല്ലാനം-കൊച്ചി തീരത്തെ തീരശോഷണത്തിനും കടൽകയറ്റത്തിനും പ്രധാന കാരണം കൊച്ചി കപ്പൽ ചാലിന്റെ സാന്നിധ്യവും കപ്പൽ ചാലിന്റെ ആഴം നിലനിർത്താൻ കൊച്ചിൻപോർട്ട് ദിവസവും നടത്തുന്ന ഡ്രെഡ്ജിങ്ങുമാണ്. നിലവിൽ കേരള സർക്കാർ നടപ്പിലാക്കിയ ടെട്രാപ്പോഡ് കടൽഭിത്തി നിർമ്മാണത്തിന് ആധാരമായ നാഷണൽ സെൻറ്റർ ഫോർ കോസ്റ്റൽ റിസർച്ച് (എൻ.സി.സി.ആർ) പഠനത്തിൽ ഈ കാര്യം ചൂണ്ടി കാണിക്കുന്നുണ്ട്.  
വേലിയേറ്റ-ഇറക്ക സമയങ്ങളിൽ കപ്പൽ ചാലിലൂടെ ഉണ്ടാകുന്ന ഒഴുക്ക് തീരക്കടലിലെ സ്വാ ഭാവിക നീരൊഴുക്കും  (Littoral Drift) തമ്മിൽ കൂട്ടി മുട്ടുകയും അതിന്റെ ഫലമായി കടലിലൂടെ തെ ക്കോട്ട് ഉണ്ടാകുന്ന ഒഴുക്ക് ഏതാണ്ട് അന്ധകാരനഴി വരെ ചെന്ന് തിരിച്ചു തീരത്തോട് ചേർന്ന് കപ്പ ൽ ചാലിലേക്ക് ഒഴുകി എത്തുന്നു. ഈ എതിരൊഴുക്കിൽ തീരത്തെ മണ്ണും കടലെടുത്തു പോകുന്നു. ഇ താണ് ചെല്ലാനം-കൊച്ചി തീരത്തെ അതിരൂക്ഷമായ തീരശോഷണത്തിനു കാരണം. വാസ്തവത്തി ൽ തീരശോഷണവും തീരപോഷണവും കടലിലെ നീരൊഴുക്കിന്റെ ഭാഗമായി ഉണ്ടാകുന്ന  സ്വാഭാ വികമായ പ്രതിഭാസമാണ്. പക്ഷെ കൊച്ചി അഴിയുടെ നിർമ്മാണം  ഈ സ്വാഭാവിക പ്രക്രിയക്ക് ഭംഗം വരുത്തി.
തീരപോഷണം ഇല്ലാതാവുകയും തീരശോഷണം സ്ഥിരമാവുകയും ചെയ്തതോടെ കിലോമീറ്ററു കൾ നീളമുണ്ടായിരുന്ന തീരമാണ്  നമുക്ക് നഷ്ടമായത്. തീരശോഷണം കൂടുന്നതിന് ആനുപാതിക മായി കടൽകയറ്റവും രൂക്ഷമാവുകയാണ്. ഈ അവസ്ഥയെ കുറിച്ച് പോർട്ട് നിർമ്മാണ വേളയിൽ തന്നെ ബ്രിട്ടീഷ് എൻജിനിയർമാർ തിരിച്ചറിഞ്ഞിരുന്നു. 1918 ൽ സമർപ്പിക്കപ്പെട്ട ഒരു റിപ്പോർട്ടിൽ കപ്പൽച്ചാലിനു ഇരുവശത്തുമുള്ള കരകളുടെ സംരക്ഷണത്തിനായി 2 മൈൽ ദൈർഘ്യത്തിൽ പുലി മുട്ടുകൾ നിർമ്മിക്കണമെന്ന് നിർദ്ദേശിക്കപ്പെട്ടിരുന്നു. പക്ഷെ കൊളോണിയൽ അധികാരികൾ ആ നിർദ്ദേശം അവഗണിക്കുകയായിരുന്നു.        
 2009 ൽ ചെല്ലാനം ഹാർബർ നിർമ്മാണത്തോടനുബന്ധിച്ച് പുലിമുട്ടുകൾ നിർമ്മിച്ചതോടു കൂ ടി ചെല്ലാനം ഹാർബർ മുതൽ ഫോർട്ട്കൊച്ചി വരെയുള്ള പ്രദേശങ്ങളിലെ കടലാക്രമണം പതിന്മട ങ്ങ്  രൂക്ഷമാവുകയും ചെയ്തു.

കടൽകയറ്റം രൂക്ഷമാവുകയും ജനകീയ പ്രതിഷേധം ശക്തമാവുകയും ചെയ്ത സാഹചര്യത്തി ലാണ് 2021 ൽ ചെല്ലാനം- തീരസംരക്ഷണ പദ്ധതി സർക്കാർ പ്രഖ്യാപിച്ചത്. 344.2 കോടി രൂപ ചിലവിൽ ചെല്ലാനം ഹാർബർ മുതൽ വടക്കോട്ട് കാട്ടിപ്പറമ്പ് CMS വരെ 12 കി.മീ ദൈർഘ്യത്തിൽ കരിങ്കൽ ടെട്രാപ്പോഡ് കൊണ്ടുള്ള കടൽഭിത്തിയും, ബസാർ-വേളാങ്കണ്ണി പ്രദേശത്ത് 6 പുലിമുട്ടുക ളും പുത്തൻതോട്-കണ്ണമാലി പ്രദേശത്ത് 9 പുലിമുട്ടുകളും നിർമ്മിക്കുമെന്നായിരുന്നു സർക്കാർ പ്ര ഖ്യാപിച്ചത്. ഒന്നാം ഘട്ടമായി ടെട്രാപ്പോഡ് കടൽഭിത്തി നിർമ്മിക്കുമെന്നും രണ്ടാംഘട്ടമായി പുലി മുട്ടുകൾ നിർമ്മിക്കുമെന്നുമായിരുന്നു പറഞ്ഞിരുന്നത്. എന്നാൽ പിന്നീട് ബാഹ്യ സമ്മർദ്ദങ്ങൾക്ക് വ ഴങ്ങി ചെല്ലാനം ഹാർബർ മുതൽ പുത്തൻതോട് ബീച്ച് വരെയുള്ള 7.350 കി.മീ കടൽഭിത്തി നിർ മ്മാണവും ബസാർ-വേളാങ്കണ്ണി പ്രദേശത്തെ 6 പുലിമുട്ടുകളും ഒന്നാം ഘട്ടമായി നടപ്പിലാക്കുമെന്നും അവശേഷിക്കുന്ന ഭാഗങ്ങളിലേത് രണ്ടാം ഘട്ടമായി നടപ്പിലാക്കുമെന്നുമായി സർക്കാർ തീരുമാനം തിരുത്തി. 2021- 2022 കാലയളവിൽ ചെല്ലാനം ഹാർബർ മുതൽ പുത്തൻതോട് ബീച്ച് വരെയുള്ള പ്ര ദേശങ്ങളിൽ പദ്ധതി നടപ്പിലാക്കി  പക്ഷെ പദ്ധതിക്ക് ആകെ വകയിരുത്തിയ 344.2 കോടി രൂപ യും 7.350 കി.മീ പ്രദേശത്തെ കടൽഭിത്തി-പുലിമുട്ട് നിർമ്മാണത്തിനായി ചെലവാക്കുകയാണ് ചെ യ്തത്. കടൽഭിത്തി നിർമ്മിക്കപ്പെട്ട  പ്രദേശങ്ങളിൽ കടൽകയറ്റം തടയപ്പെട്ടെങ്കിലും പുത്തൻതോട് ബീച്ചിനു വടക്കോട്ട് പുത്തൻതോട്-കണ്ണമാലി-ചെറിയകടവ്-മാനാശ്ശേരി-സൗദി പ്രദേശങ്ങളിൽ ക ടൽകയറ്റം അതിരൂക്ഷമായി. കടൽഭിത്തി നിർമ്മിച്ച പ്രദേശങ്ങളിൽ മുന്നേ അനുഭവപ്പെട്ടിരുന്ന രൂ ക്ഷമായ കടൽകയറ്റം കടൽഭിത്തി ദുർബലമായ വടക്കൻ പ്രദേശങ്ങളിലേക്ക് ദിശ മാറ്റി എന്നതാ യിരുന്നു ഒന്നാം ഘട്ടമായി നടപ്പിലാക്കിയ കടൽഭിത്തി നിർമ്മാണത്തിന്റെ ഫലം. കടലിലെ നീ രൊഴുക്കിനെ കുറിച്ച് തീരദേശത്തെ മത്സ്യത്തൊഴിലാളികൾക്ക് ഉള്ള പ്രാഥമിക ധാരണ പോലും ഇ ല്ലാതെ ബാഹ്യസമ്മർദ്ദങ്ങൾക്ക് വഴങ്ങി അശാസ്ത്രീയമായ നിർമ്മാണ രീതി അവലംബിച്ചത് കൊ ണ്ടു മാത്രമാണ് നിലവിൽ പുത്തൻതോട് മുതൽ വടക്കോട്ടുള്ള പ്രദേശങ്ങളിൽ കടൽകയറ്റം രൂക്ഷമാ കാൻ കാരണം.
കഴിഞ്ഞ സർക്കാർ അതിന്റെ അവസാന നാളുകളിൽ കിഫ്‌ബി ഫണ്ട് ഉപയോഗിച്ച് 404 കോ ടി രൂപ ചെലവിൽ 6.1 കി.മീ. രണ്ടാം ഘട്ടമായി ചെല്ലാനം പഞ്ചായത്ത് അതിർത്തി വരെ കടൽഭി ത്തി നിർമ്മിക്കാനുള്ള ഭരണാനുമതി നൽകിയിരുന്നു. എന്നാൽ സാങ്കേതികാനുമതി, സാമ്പത്തികാ നുമതി തുടങ്ങിയ  മറ്റു നടപടികൾ ഒന്നും പൂർത്തിയാക്കിയിരുന്നില്ല. അത് കൊണ്ട് തന്നെ ഈ വർ ഷ കാലം ചെല്ലാനം-കൊച്ചി തീരത്ത് കടൽകയറ്റവും അതിനെ തുടർന്നുള്ള ദുരിതങ്ങളും ആവർത്തി ക്കും എന്നത് ഏറെക്കുറെ ഉറപ്പായിരിക്കുകയാണ്.

കഴിഞ്ഞ തെരഞ്ഞെടുപ്പിൽ ചെല്ലാനം പാക്കേജ് നടപ്പിലാക്കും എന്നത് ഉൾപ്പടെ തീരദേശ ത്തെ പരിസ്ഥിതി സംരക്ഷണത്തിനായി നിരവധി നടപടികൽ സ്വീകരിക്കുമെന്ന് യുഡിഎഫ് പ്രക ടന പത്രികയിൽ വാഗ്ദാനം ചെയ്തിരുന്നു. കേരളത്തിലെ തീരപ്രദേശങ്ങളിൽ അതി തീവ്ര തീരശോ ഷണം നേരിടുന്ന പ്രദേശമാണ് ചെല്ലാനം-കൊച്ചി തീരം. കടൽക്ഷോഭത്തിൽ ഏറ്റവും അധികം റവ ന്യൂ ഭൂമി നഷ്ടമായ തീരപ്രദേശവും ഇത് തന്നെയാണ്. ഈ സാഹചര്യത്തിൽ ശാസ്ത്രീയമായ തീര സംരക്ഷണ നടപടികൾ ഇവിടെ അത്യവശ്യമാണ്. കഴിഞ്ഞ സർക്കാർ പ്രഖ്യാപിച്ച കടൽഭിത്തി നിർമ്മാണം ഈ പ്രദേശത്തിന്റെ സുരക്ഷക്ക് അത്യാവശ്യമാണ്. പക്ഷെ കടൽഭിത്തി നിർമ്മാണം മാനാശ്ശേരി, സൗദി, ബീച്ച്റോഡ് എന്നീ കോർപ്പറേഷൻ പ്രദേശങ്ങൾ കൂടി ഉൾപ്പെടുന്ന വിധത്തി ൽ നീട്ടി നടപ്പിലാക്കണം. അതല്ലെങ്കിൽ ചെല്ലാനം പഞ്ചായത്തിലെ രൂക്ഷമായ കടൽകയറ്റം തടയ പ്പെടുമ്പോൾ അതിനു വടക്കോട്ടുള്ള  കൊച്ചി കോർപ്പറേഷൻ പരിധിയിലെ പ്രദേശങ്ങളിൽ കടൽ ക യറ്റം ഇപ്പോൾ ഉള്ളതിന്റെ പതിന്മടങ്ങായി വർദ്ധിക്കും.  
കടൽഭിത്തി നിർമ്മാണത്തോടൊപ്പം തീരശോഷണവും പരിഹരിക്കാനുള്ള നടപടികൾ കൂടി സ്വീകരിച്ചാലേ കടൽകയറ്റം പൂർണ്ണമായി പരിഹരിക്കാനാകൂ. ദൗർഭാഗ്യവശാൽ ചെല്ലാനം-കൊച്ചി പ്രദേശത്തെ തീരക്കടൽ അതീവ ഗുരുതരമായ എക്കൽ കമ്മി നേരിടുന്ന പ്രദേശമാണ്. തീരപോഷ ണത്തിനു ആവശ്യമായ എക്കൽ ഈ തീരത്തേക്ക് എത്തുന്നില്ല. അത് കൊണ്ട് തന്നെ തീരശോഷ ണത്തിന്റെ ആഘാതം കുറയ്ക്കാനും കടൽകയറ്റം പരിഹരിക്കാനും കൃത്രിമമായ തീര പുനർനിർമ്മാണ നടപടികൾ ചെല്ലാനം-കൊച്ചി തീരത്ത് അത്യാവശ്യമാണ്. വർഷം തോറും 24 മില്യൺ ക്യൂബിക് മീറ്റർ എക്കൽ കൊച്ചിൻപോർട്ട് കപ്പൽ ചാലിൽ നിന്ന് നീക്കം ചെയ്യുന്നുണ്ട്. നിലവിൽ ഈ എക്ക ൽ 10 നോട്ടിക്കൽ മൈൽ അകലെ ആഴക്കടലിൽ നിക്ഷേപിക്കുകയാണ് ചെയ്യുന്നത്. ഈ എക്കൽ ഉപയോഗിച്ച് കൊണ്ട് ബീച്ച് നൗറീഷ്മെന്റ് നടപ്പിലാക്കിയാൽ ചെല്ലാനം-കൊച്ചി തീരത്തെ തീര ശോഷണവും കടൽകയറ്റവും പരിഹരിക്കാൻ കഴിയും. അപ്രകാരം നിക്ഷേപിക്കുന്ന എക്കൽ വീ ണ്ടും ഒഴുകി നഷ്ടമാകാതിരിക്കാൻ ജിയോ സിന്തറ്റിക് ട്യൂബുകൾ ഉപയോഗിച്ച് കൊണ്ട് പുലിമുട്ടുകൾ കൂടി നിർമ്മിച്ചാൽ 1928 കൊച്ചി തുറമുഖത്തിന്റെ ആധുനികവൽക്കരണത്തിന് ശേഷം നമുക്ക് നഷ്ട പ്പെട്ട കിലോമീറ്ററുകളോളം തീരം നമുക്ക് പുനർനിർമ്മിച്ചെടുക്കാൻ കഴിയും. ചെലവ് വളരെ കുറഞ്ഞ തും ലോകത്തിനാകെ തന്നെ ഒരു മികച്ച പരിസ്ഥിതി സംരക്ഷണ മാതൃകയാകുന്നതുമായ നടപടി ആയിരിക്കും ഇത്.
ആയതിനാൽ ചെല്ലാനം-കൊച്ചി ജനകീയ വേദി താഴെ പറയുന്ന ആവശ്യങ്ങൾ അങ്ങയുടെ മു ന്നിൽ സമർപ്പിക്കുകയാണ്.

 1. കേരള സർക്കാർ നിലവിൽ ഭരണാനുമതി നൽകിയിട്ടുള്ള പുത്തൻതോട് മുതൽ ചെല്ലാനം പ ഞ്ചായത്ത് അതിർത്തി വരെയുള്ള കടൽഭിത്തി നിർമ്മാണം ഉടൻ ആരംഭിക്കാൻ വേണ്ടുന്ന നടപടി കൾ സ്വീകരിക്കുക.
2. ചെല്ലാനം പഞ്ചായത്ത് അതിർത്തിയുടെ വടക്കുള്ള മാനാശ്ശേരി, സൗദി, ബീച്ച്റോഡ് തുട ങ്ങിയ പ്രദേശങ്ങളിലേക്ക് കൂടി നിർദ്ദിഷ്ട കടൽഭിത്തി നിർമ്മാണം നീട്ടുക.
3. കൊച്ചിൻപോർട്ടിൽ നിന്നും എക്കൽ ലഭ്യമാക്കി ചെല്ലാനം-കൊച്ചി തീരം പുനർനിർമ്മിക്കു ക.
4. തീരത്ത് നിക്ഷേപിക്കുന്ന എക്കൽ നഷ്ടമാകാതിരിക്കാൻ തീരത്തുടനീളം ജിയോട്യൂബ് കൊ ണ്ടുള്ള പുലിമുട്ടുകൾ നിർമ്മിക്കുക.
5. മഴക്കാലപൂർവ്വ കടൽകയറ്റ പ്രതിരോധ നടപടികൾ യുദ്ധകാലാടിസ്ഥാനത്തിൽ നടപ്പിലാ ക്കുക.
6. കനാലുകളും ഇടത്തോടുകളും മണ്ണ് നീക്കം ചെയ്തു നീരൊഴുക്കിന് യോഗ്യമാക്കുകയും ദുർബല മായ കടൽഭിത്തിയുള്ളതും കടൽഭിത്തി തീരെ ഇല്ലാത്തതുമായ പ്രദേശങ്ങളിൽ ജിയോ ബാഗുകൾ കൊണ്ടുള്ള താൽക്കാലിക സുരക്ഷാ നടപടികൾ എത്രയും പെട്ടെന്ന് പൂർത്തിയാക്കുക.
കഴിഞ്ഞ 2 പതിറ്റാണ്ടായി കടൽകയറ്റം മൂലം വിവരണാതീതമായ ദുരിതങ്ങളാണ് ചെല്ലാനം- കൊച്ചി തീരത്തെ ജനങ്ങൾ നേരിടുന്നത്. ജനങ്ങളെയും പരിസ്ഥിതിയെയും കണക്കിലെടുത്തു കൊ ണ്ടുള്ള പരിഹാരങ്ങൾ ഇനിയും ഇല്ലാത്ത പക്ഷം ഈ തീരം അധികം വൈകാതെ തന്നെ ഇല്ലാതാ യി തീരും. ഈ സാഹചര്യത്തിൽ ബഹുമാനപ്പെട്ട അങ്ങയുടെ ദയവുണ്ടായി മേൽ ആവശ്യങ്ങൾ നട പ്പിലാക്കാൻ  വേണ്ടുന്ന സത്വര നടപടികൾ ഉണ്ടാകണമെന്ന് അപേക്ഷിക്കുന്നു.


 എന്ന് 27-05-2026
 

 അഡ്വ.തുഷാർ നിർമ്മൽ സാരഥി                                                           വി.ടി സെബാസ്റ്റ്യൻ
വർക്കിങ് ചെയർപേഴ്‌സൺ                                                                   ജനറൽ കൺവീനർ
Ph: 9633027792                                                                                         Ph: 9349249678
 



പ്രതിഷേധ ധർണ്ണ ജൂൺ 30

 

 പ്രിയ സുഹൃത്തേ,

പ്രിയ സുഹൃത്തെ,
2018 ജൂലൈ 31 നാണ് അന്നത്തെ കേരള മുഖ്യമന്ത്രി പിണറായി വിജയൻ ലൈഫ് മിഷൻ പദ്ധതിയിൽ ഉൾ പ്പെടുത്തി പി & ടി കോളനി നിവാസികളെ പുനരധിവ സിപ്പിക്കുന്നതിനായി മുണ്ടംവേലിയിൽ GCDA നിർമ്മി ക്കുന്ന പി & ടി അപ്പാർട്ട്മെന്റിന്റെ ശിലാസ്ഥാപനം നി ർവ്വഹിച്ചത്. 5 പതിറ്റാണ്ടായി തികച്ചും പരിതാപകരമാ യ സാഹചര്യങ്ങളിൽ കടവന്ത്ര ഗാന്ധിനഗറിൽ പേരണ്ടൂ ർ കനാൽ പുറമ്പോക്കിൽ കഴിയുന്ന ഭൂരഹിതരും ഭവനര ഹിതരുമായ 90 കുടുംബങ്ങളെ പുനരധിവസിപ്പിക്കാൻ ഉ ദ്ദേശിച്ചായിരുന്നു മുണ്ടംവേലിയിൽ അപ്പാർട്ട്മെന്റ് നിർ മ്മിച്ചത്. 2023 അവസാനത്തോടെ അപ്പാർട്ട്മെന്റുകളുടെ താക്കോലുകൾ കൈമാറിയെങ്കിലും പണി പൂർത്തിയാകാ ത്തതിനാൽ താമസമാരംഭിയ്ക്കാൻ കഴിഞ്ഞില്ല. പിന്നീട് നിർമ്മാണം പൂർത്തിയാക്കി എന്നവകാശപ്പെട്ടു കൊണ്ട് 2024 ജനുവരി 31 നു 78 കുടുംബങ്ങളെ അപ്പാർട്ട്മെന്റിൽ പുനരധിവസിപ്പിച്ചു. അന്നേ ദിവസം തന്നെ അവർ അന്നു വരെ താമസിച്ചിരുന്ന പേരണ്ടൂർ കനാൽ പുറമ്പോക്കിലെ പി & ടി കോളനിയിലെ വീടുകൾ ജെസിബി ഉപയോഗി ച്ച് തകർത്ത് കളയുകയും ചെയ്തു. 

GCDA യുടെ ഉടമസ്ഥതയിലുള്ള 70 സെന്റ് വരുന്ന സ്ഥ ലത്താണ് അപ്പാർട്ട്മെന്റ് നിർമ്മിച്ചിരിക്കുന്നത്. 4 നില കളുള്ള രണ്ടു കെട്ടിടങ്ങളിൽ 78 കുടംബങ്ങളിലായി ഏതാ ണ്ട് 400-ഓളം അന്തേവാസികളാണ് ഇവിടെയുള്ളത്. താ മസം തുടങ്ങി 14-)o ദിവസം പെയ്ത മഴയിൽ തന്നെ അപ്പാ ർട്ട്മെന്റിലെ രണ്ടു വീടുകൾ ചോർന്നൊലിക്കാൻ തുടങ്ങി. തുടർന്ന് മറ്റുവീടുകളും ചോരാൻ തുടങ്ങി. ഒരാഴ്ച്ച കഴിഞ്ഞ പ്പോൾ തന്നെ സെപ്റ്റിക് ടാങ്ക് നിറഞ്ഞു കവിഞ്ഞു പുറ ത്തേക്കൊഴുകാൻ തുടങ്ങി. കടുത്ത ദുരിതങ്ങൾ സഹിച്ചു കൊണ്ടാണ് ഒട്ടും വാസയോഗ്യമല്ലാത്ത ഈ അപ്പാർട്ട്മെ ന്റിൽ കുടുംബങ്ങൾ കഴിയുന്നത്. മനുഷ്യജീവനെ പരിഗ ണിക്കാതെയും, നിർമ്മാണ സാമഗ്രികളുടെ ഗുണമേന്മ ഉ റപ്പാക്കാതെയും, മതിയായ ജാഗ്രതയില്ലാതെയും നിർമ്മി ച്ചിട്ടുള്ള കെട്ടിടങ്ങളാണ് പി & ടി അപ്പാർട്ട്മെന്റിലേത്.

ഹൈടെൻഷൻ ഇലക്ട്രിക്ക് ലൈനുകൾക്കിടയിലെ മരണക്കെണി

അരൂർ-മട്ടാഞ്ചേരി 110 K.V. ലൈനിൽ നിന്നും നിയമ പരമായ അകലം പാലിക്കാതെയാണ് ഈ കെട്ടിടങ്ങൾ നിർമ്മിച്ചിട്ടുള്ളത്. കേന്ദ്ര വൈദ്യുതിഅതോറിറ്റി ചട്ടങ്ങൾ പ്രകാരം 2.9 മീ. അകലം വേണ്ടിടത്ത് 2.5 മീ. അകലമേ ഉള്ളൂ. കിഴക്കു 110 K.V. ലൈൻ  ആണെങ്കിൽ പടിഞ്ഞാറ് 66 K.V. ലൈൻ കടന്നുപോകുന്നു. ഇതിനുരണ്ടിനുമിടക്കാ ണ് ഇരുമ്പു ഡെക്ക് ഷീറ്റുകൾ കൊണ്ട് മേൽക്കൂരയും ഇരു മ്പു പില്ലറുകളും ബീമുകളുമുപയോഗിച്ച് നിർമ്മിച്ച കെട്ടിടം നിൽക്കുന്നത്. 110 K.V. ലൈൻ വളരെ അടുത്തുകൂടി കടന്നു പോകുന്നതുകൊണ്ട് ഈർപ്പമുള്ള അന്തരീക്ഷത്തിലൂടെ വൈദ്യുതി പ്രവഹിക്കുന്നതിനാൽ അപ്പാർട്ട്മെന്റുകൾക്ക കത്ത് ഇരിക്കുമ്പോൾ പോലും അന്തേവാസികൾക്ക് ഷോ ക്ക് ഏൽക്കുന്നത് പതിവാണ്. വൈദുതി പ്രസരണം മൂലം ഇലക്ട്രിക്കൽ സുരക്ഷാ ഉപകരണങ്ങളും, ഇലക്ട്രിക്കൽ-ഇ ലക്ട്രോണിക് ഗ്രഹോപകരണങ്ങളും അടിക്കടി കേടു വരുന്നു.

കെട്ടിടത്തിന്റെ ബലക്ഷയം.

Autoclaved aerated concrete blocks (AAC) ഉപയോ ഗിച്ചാണ് പി & ടി അപ്പാർട്ട്മെന്റ് നിർമ്മിച്ചിരിക്കുന്നത്.  പ്രൊസസ്ഡ് സിമന്റ് കട്ടകളായ ഇവയ്ക്ക് ചൂട് പ്രതിരോ ധിക്കാൻ ശേഷിയില്ല. ഉള്ളിൽ സുഷിരങ്ങൾ ഉള്ളതിനാ ൽ ഇത് വെള്ളം ആഗിരണം ചെയ്യും. ഇത് കെട്ടിടത്തി ലെ ചോർച്ചക്കു കാരണമാകുന്നു. ചുവരുകൾ ചോർന്നൊ ലിക്കുന്നത് കൊണ്ട് കെട്ടിടത്തിന്റെ ഭിത്തികൾ ദുർബല മായിരിക്കുന്നു.

മേൽക്കൂര നിർമ്മിക്കാൻ ഉപയോഗിച്ചിട്ടുള്ള ഇരുമ്പ് ഡെക്ക്ഷീറ്റുകൾ തീരദേശത്തെ കാലാവസ്ഥക്ക് ഒട്ടും അനു യോജ്യമല്ല. ഇവയുടെ corrosion(തുരുമ്പിക്കൽ) നിരക്ക് വ ളരെ കൂടുതലാണ്. 2 വർഷങ്ങൾ കൊണ്ട് തന്നെ മേൽക്കൂ രയും ഇരുമ്പുപില്ലറുകളും തുരുമ്പിച്ചു കെട്ടിടത്തിന് ബലക്ഷ യം ഉണ്ടായിട്ടുണ്ട്. തെർമൽ ഇൻസുലേഷൻ ഇല്ലാത്തതി നാൽ ഇവ അന്തരീക്ഷ താപനിലക്കനുസരിച്ച് ചുട്ടുപഴുത്ത് കടുത്തചൂടാണ് അപ്പാർട്ട്മെന്റിൽ അനുഭവപ്പെടുന്നത്. ഇ രുമ്പ് ഷീറ്റുകളും ബീമുകളും ചൂടുപിടിക്കുന്നതിലൂടെയും സി മന്റ് കട്ടകൾക്ക് ചൂട് പ്രതിരോധിക്കാൻ കഴിയാത്തതു കൊ ണ്ടും കടുത്തചൂട് അനുഭവപ്പെടുകയും താമസക്കാർക്ക് പൊ ള്ളലേൽക്കുകയും ചെയ്യുന്നു.

GCDA യുടെ അഭ്യർത്ഥനപ്രകാരം കെട്ടിടങ്ങളെ കുറിച്ച് ചെന്നൈ IIT പഠനം നടത്തി ഒരു റിപ്പോർട്ട് നൽകിയിരുന്നു. അതിലെ നിർദ്ദേശങ്ങളിലൊന്ന് 2026 മെയ് 31-നകം കെ ട്ടിടങ്ങളുടെ structure ബലപ്പെടുത്താനുള്ള നടപടികൾ പൂ ർത്തിയാക്കണമെന്നാണ്. സ്ട്രക്ച്ചർ ബലപ്പെടുത്തിയാൽ പോലും അത് നിലനിൽക്കാനുള്ള സാധ്യതയില്ല.

നിർമ്മാണത്തിലെ അപാകതകൾ

കൈകൊണ്ട് ഒന്നുതുടച്ചാൽപോലും അടർന്നു വീഴുന്ന വിധം കെട്ടിടത്തിൽ ഭൂരിഭാഗം ഇടങ്ങളിലും ലൂസ് പ്ലാസ്റ്റ റിങ്ങാണുള്ളത്. പ്ലംബിങ്ങിനുപയോഗിച്ച ഗുണമേന്മയില്ലാ ത്ത പൈപ്പുകൾ ഭിത്തികൾക്കുള്ളിൽ പലയിടത്തും പൊ ട്ടി വെള്ളം നഷ്ടമാകുന്നതിനും ഭിത്തികൾ നനഞ്ഞു ദുർബ ലമാകുന്നതിനും കാരണമാകുന്നു. ഗുണമേന്മയില്ലാത്ത സാ മഗ്രികൾ കൊണ്ട് നിർമ്മിച്ചതിനാൽ അപ്പാർട്ട്മെന്റുകളി ൽ പലയിടത്തും കോൺക്രീറ്റ് അടർന്നുവീഴുന്നു. ദിനംപ്ര തി ചുമരുകളിൽ വിള്ളലുകൾ പ്രത്യക്ഷപ്പെടുകയാണ്. കെ ട്ടിടങ്ങൾക്കു മുകളിൽ സ്ഥാപിച്ചിട്ടുള്ള വാട്ടർ ടാങ്കുകളും വി ണ്ടുകീറിയിരിക്കുന്നു. ദിവസങ്ങൾക്കുമുമ്പാണ് സീലിംഗ് ഫാൻ അടർന്നുവീണ് ഒരന്തേവാസിക്ക് സാരമായ പരിക്ക് പറ്റിയത്.  മേൽക്കൂരയിലെ ഇരുമ്പുഷീറ്റുകൾ തുരുമ്പിച്ചു പൊടിഞ്ഞു ഭക്ഷണസാധനങ്ങളിൽ പാറിവീഴുന്നതിനാൽ പലപ്പോഴും ഭക്ഷണം ആഹാരയോഗ്യമല്ലാതാകുന്നു.

ശുചി മുറികളിൽ നിന്ന് ആസിഡ് കലർന്ന സോപ്പ്-ഡിറ്റർജെന്റ് വെള്ളവും വിസർജ്യങ്ങളും ചോർന്നൊലിച്ച്  ഭിത്തികൾ ദുർബലമാകുന്നു. ഇതേകാരണംകൊണ്ട് തന്നെ ഇരുമ്പ് ബീമുകളും മേ ൽക്കൂരയും തുരുമ്പിച്ച് ദുർബലമാകുന്നു. നനഞ്ഞ ഭിത്തി കളിൽ പൂപ്പലും പായലുംപിടിച്ച് രോഗങ്ങൾ ഉണ്ടാക്കു ന്നു. ശുചിമുറികളിലെ ചോർച്ചമൂലം കുടപിടിച്ചുകൊണ്ട് പാചകം ചെയ്യേണ്ട അവസ്ഥയാണ് അന്തേവാസികൾ ക്ക്. ഇതുമൂലം സ്വസ്ഥമായി ഭക്ഷണമുണ്ടാക്കി കഴിക്കാ ൻ പറ്റുന്നില്ല. വീതികുറഞ്ഞ ഇടനാഴികളുടെ ഇരുവശ ത്തുമായിട്ടാണ് ഇവിടെ ഭവനങ്ങൾ പണിതിട്ടുള്ളത്. പു റത്തേക്ക് തുറക്കാൻ കഴിയാത്ത വിധമാണ് ജനലുകൾ. മതിയായ വെന്റിലേഷൻ സംവിധാനങ്ങൾ ഇല്ലാത്ത തിനാൽ ശുദ്ധവായുലഭ്യത കുറയുന്നു. 

4 നിലകളുള്ള കെട്ടിടത്തിൽ ലിഫ്റ്റോ മതിയായ ഫയർ റെസ്ക്യൂ സംവിധാനങ്ങളോ വേസ്റ്റ് മാനേജ്‌മെന്റ് പദ്ധതി യോ വാഹനപാർക്കിങ് സൗകര്യമോ ബയോഗ്യാസ് പ്ലാ ന്റുകളോ കുട്ടികൾക്കുള്ള കളിസ്ഥലമോ ഇല്ല. ഇടുങ്ങിയ കോണിപ്പടികളിലൂടെ രോഗികളേയും വൃദ്ധരെയും താഴെ യെത്തിക്കുക പ്രയാസമാണ്. സെപ്റ്റിക് ടാങ്കുകൾ കവി ഞ്ഞൊഴുകി അപ്പാർട്ട്മെന്റിന് കിഴക്കുള്ള സാന്തോം കോ ളനിയിലേക്കാണ് എത്തുന്നത്. ഇത് അവരുടെ ജീവി തവും നരകതുല്യമാക്കുന്നു. ഒട്ടുംശുചിത്വമില്ലാത്ത ജീവിത പരിസരങ്ങൾമൂലം കുട്ടികൾക്ക് ഉറക്കമില്ലായ്മ, അലർജി, മാനസികപിരിമുറുക്കം, വിവിധ ശാരീരിക പ്രശ്നങ്ങൾ, എ ന്നിവയുണ്ടാകുന്നു. 110 K. V. ലൈനിൽനിന്നുള്ള EMF(വൈ ദ്യുത കാന്തികവലയം) റേഡിയേഷൻ അന്തേവാസികളു ടെ ആരോഗ്യത്തെ സാരമായി ബാധിക്കുന്നു. 

ഭവനരഹിതരെ പുനരധിവസിപ്പിക്കാൻ എന്നപേരി ൽ പൊതുപണം ചെലവഴിച്ചുനിർമ്മിച്ച മരണക്കെണിയാ ണ് പി & ടി അപ്പാർട്ട്മെന്റ്. പോകാനിടമില്ലാത്തതിനാ ൽ സർക്കാർ ഒരുക്കിക്കൊടുത്ത ദുരിതകൂടാരത്തിൽ തള ച്ചിടപ്പെട്ടവരാണ് ഇവിടെയുള്ളവർ. ഈ കടുത്ത അനീതി ക്കെതിരെ ശക്തമായ പ്രതിഷേധം പൊതുസമൂഹത്തിൽ നിന്നും  ഉയർന്നുവരേണ്ടതുണ്ട്. ജൂൺ 30 നു തോപ്പുംപടിയി ൽ വച്ച് നടക്കുന്ന പ്രതിഷേധ ധർണ്ണയിൽ എല്ലാ ജനാധി പത്യവിശ്വാസികളും പങ്കെടുക്കണമെന്ന് അഭ്യർത്ഥിക്കുന്നു.

                                                                       

                                     അഭിവാദ്യങ്ങളോടെ,
                                    പി & ടി അപ്പാർട്ട്മെന്റ് പുനരധിവാസ സമര ഐക്യദാർഢ്യ സമിതി                                                                      Ph: 9349249678, 9048406045
09-06-2026             


ഏക ദിന ധർണ്ണ ജൂൺ 14

 

 പ്രിയ സുഹൃത്തേ,

തീരസംരക്ഷണത്തിൻ്റെ കാര്യത്തിൽ അത്യധികം അവഗണന നേരിടുന്ന ഒരു തീരപ്രദേശമാണ് ചെല്ലാനം പഞ്ചായത്തിന് വടക്കുള്ള  കൊച്ചി മുൻസിപ്പൽ കോർപ്പറേഷനിലെ മാനാശ്ശേരി മുതൽ ബീച്ച് റോഡ് വരെയുള്ള തീരപ്രദേശം. ചെല്ലാനം ഹാർബർ മുതൽ ബീച്ച് റോഡ് വരെയുള്ള ഏതാണ്ട് 18 കി.മീ വരുന്ന തീരം കടുത്ത തീരശോഷണവും രൂക്ഷമായ കടൽ കയറ്റവും നേരിടുന്ന തീരദേശമാണ്. എന്നാൽ ഈ തീരത്തെ ഒരുമിച്ചു പരിഗണിക്കുന്നതിന് പകരം ജനകീയ പ്രതിഷേധം ശക്തമാകുമ്പോൾ തുണ്ടു തുണ്ടായി തിരിച്ചു  തീര സംരക്ഷണ പദ്ധതികൾ നടപ്പിലാക്കാനാണ് നാളിതു വരെ സർക്കാരുകൾ ശ്രമിച്ചിട്ടുള്ളത്.  

കഷ്ണങ്ങളായി മുറിച്ച് കടൽഭിത്തി നിർമ്മിക്കുമ്പോൾ കടൽഭിത്തി പണിത അത്രയും പ്രദേശങ്ങളിൽ   കടൽകയറ്റം തടയപ്പെടുകയും എന്നാൽ അതിനു  വടക്കോട്ടുള്ള പ്രദേശങ്ങളിൽ  ശക്തമായ കടൽകയറ്റം ഉണ്ടാകുകയും ചെയ്യും. ഈ ഭാഗങ്ങളിൽ മുൻപ് നിർമ്മിച്ച ദുർബലമായ കടൽ ഭിത്തികൾ ഉണ്ടെങ്കിൽ പോലും അവ തകർത്തു കൊണ്ട് വെള്ളം കയറും. കടൽകയറ്റം ശക്തമായ പുത്തൻ തോട് ബീച്ചിനു തെക്കുള്ള പ്രദേശങ്ങളിൽ കടൽഭിത്തിയും പുലിമുട്ടുകളും പണിതപ്പോൾ ബീച്ചിനു വടക്ക് പുത്തൻ തോടും  കണ്ണമാലിയിലും ചെറിയകടവും കടൽകയറ്റം ശക്തമായത് നമ്മൾ കണ്ടതാണ്. ചെല്ലാനം-കൊച്ചി തീരത്ത്  കടൽഭിത്തി നിർമ്മാണം കഷ്ണങ്ങളായി നടപ്പാക്കുന്നതിൻ്റെ ദുരിതമാണ് ഇന്ന് ഈ തീരജനത നേരിടുന്നത്.


അത് കൊണ്ട് ഇനിയും തീരസംരക്ഷണ നടപടികൾ കഷ്ണങ്ങളായി മുറിച്ചു നടപ്പിലാക്കുന്നതിന് പകരം പുത്തൻ തോട് മുതൽ ബീച്ച് റോഡ് വരെ ഒറ്റ യുണിറ്റ് ആയി പരിഗണിച്ച് കൊണ്ട് കടൽഭിത്തി നിർമ്മിക്കാൻ കേരളം സർക്കാർ തയ്യാറാകണം. അതോടൊപ്പം കൊച്ചിൻ പോർട്ട് ഡ്രഡ്ജ് ചെയ്തെടുത്ത് 10 നോട്ടിക്കൽ മൈൽ അകലെ കൊണ്ട് കടലിൽ കളയുന്ന എക്കൽ ഉപയോഗിച്ച് ചെല്ലാനം-കൊച്ചി തീരം പുനഃനിർമ്മിക്കുകയും തീരം വീണ്ടും കടലെടുത്തു പോകാതിരിക്കാൻ ജിയോ സിന്തറ്റിക് ട്യൂബ് ഉപയോഗിച്ച് കൊണ്ടുള്ള പുലിമുട്ടുകൾ ഇട്ട് സംരക്ഷിക്കാനും കേരളം സർക്കാർ തയ്യാറാകണം.

 സർക്കാരിൻ്റെ അടിയന്തിര ശ്രദ്ധ ഈ കാര്യങ്ങളിൽ ഉണ്ടാകേണ്ടതിനായി നമ്മുടെ ആവശ്യങ്ങൾ ഉന്നയിച്ചു കൊണ്ട്  ചെല്ലാനം-കൊച്ചി ജനകീയവേദിയുടെയും കെ എൽ സി എ  കണ്ടക്കടവ് ഫെറോന യൂണിറ്റും സംയുക്തമായി ഒരു ഏക ദിന ധർണ്ണ സംഘടിപ്പിക്കുകയാണ്. 2026 ജൂൺ 14 നു സൗദി ബസ്സ് സ്റ്റോപ്പിന് സമീപം നടക്കുന്ന ധർണ്ണയിൽ മുഴുവൻ സുഹൃത്തുക്കളും പങ്കെടുക്കണമെന്ന് അഭ്യർത്ഥിക്കുന്നു.

ചെല്ലാനം കടൽകയറ്റം-: സർക്കാർ ലക്ഷ്യമിടുന്നതെന്ത് ?

 ചെല്ലാനം കടൽകയറ്റം-:  സർക്കാർ ലക്ഷ്യമിടുന്നതെന്ത്  ? ചെല്ലാനമെന്നത് ഇന്ന് കടൽകയറ്റത്തിന്റെ ഒരു സമവാക്യനാമമായി പൊതുസമൂഹത്തിനു മുന്നിൽ നിവർന്...