മഹാമാരിയുടെ ആധികൾക്കും ആകുലതകൾക്കുമിടയിൽ മറ്റൊരു തെരഞ്ഞെടുപ്പ് മഹാമഹം കൂടി അരങ്ങേറുകയാണ്. കൊട്ടിഘോഷിക്കപ്പെടുന്ന നമ്മുടെ ജനാധിപത്യ സംവിധാനത്തിലെ പ്രാദേശിക ഭരണയന്ത്രങ്ങൾ ആര് നിയന്ത്രിക്കണം എന്ന് തീരുമാനിക്കപ്പെടുന്ന തെരഞ്ഞെടുപ്പാണ് അടുത്തുവരുന്നത്. പതിവുപോലെ പാലിച്ചതും ലംഘിച്ചതുമായ വാഗ്ദാനങ്ങളെപ്പറ്റിയുള്ള ആരോപണ-പ്രത്യാരോപണങ്ങളാലും അന്തരീക്ഷം മുഖരിതമാണ്. നിരന്തരമായ കടൽകയറ്റത്താൽ ചെല്ലാനം-കൊച്ചി തീരത്തിന്റെ നിലനിൽപ്പ് തന്നെ ചോദ്യം ചെയ്യപ്പെടുന്ന ഗുരുതരമായ ഒരു സാഹചര്യത്തിലാണ് പഞ്ചായത്ത് തെരഞ്ഞെടുപ്പ് നടക്കുന്നത്. കടൽകയറ്റ പ്രശ്നത്തിന് പരിഹാരം ആവശ്യപ്പെട്ട് ചെല്ലാനം-കൊച്ചി ജനകീയവേദി നടത്തിവരുന്ന അനിശ്ചിതകാല റിലേ നിരാഹാരസമരം 400-)ം ദിവസം തികയുന്ന സന്ദർഭം കൂടിയാണിത്. പഞ്ചായത്ത് നിലനിന്നാലല്ലേ പഞ്ചായത്ത് ഭരണസമിതിയ്ക്ക് പ്രസക്തിയുള്ളൂ. അതുകൊണ്ട് ഫോർട്ടുകൊച്ചി മുതൽ ചെല്ലാനം വരെയുള്ള തീരസംരക്ഷണ വിഷയത്തോട് തെരഞ്ഞെടുപ്പിൽ മത്സരിക്കുന്ന മുന്നണികളുടേയും രാഷ്ട്രീയപാർട്ടികളുടെയും സംഘടനകളുടേയും സമീപനം ചർച്ച ചെയ്യപ്പെടേണ്ടത് അനിവാര്യമാണ്. ഈ സാഹചര്യത്തിലാണ് ചെല്ലാനം ജനകീയവേദിയുടെ പഞ്ചായത്ത് തെരഞ്ഞെടുപ്പിനോടുള്ള സമീപനം ജനങ്ങൾക്ക് മുൻപാകെ വിശദീകരിക്കാൻ തീരുമാനിച്ചിട്ടുള്ളത്.
തെരഞ്ഞെടുപ്പ് ബഹിഷ്കരിക്കണമെന്നും അതല്ല തെരഞ്ഞെടുപ്പിൽ വോട്ട് രേഖപ്പെടുത്തണമെന്നുമുള്ള വ്യത്യസ്ത അഭിപ്രായങ്ങൾ ചെല്ലാനം ജനകീയവേദി ചർച്ച ചെയ്യുകയുണ്ടായി. ചെല്ലാനം ജനകീയവേദിയിൽ സജീവസാന്നിധ്യമായ ചിലരെല്ലാം ഈ തെരഞ്ഞെടുപ്പിൽ സ്ഥാനാർഥികളായി മത്സരിക്കുന്നുമുണ്ട്. ഈ സാഹചര്യത്തിൽ വിശദമായ ചർച്ചകൾക്ക് ശേഷം തെരഞ്ഞെടുപ്പ് സംബന്ധിച്ച് നിലപാട് രൂപീകരിച്ചിട്ടുണ്ട്.
കടൽകയറ്റം:ചെല്ലാനം നേരിടുന്നത് ഒരു മനുഷ്യനിർമ്മിത ദുരന്തം
ചെല്ലാനം ഉൾപ്പടെയുള്ള പടിഞ്ഞാറൻ കൊച്ചിയുടെ ഭൂവിസ്തൃതി തന്നെ വലിയ തോതിൽ കുറച്ചു കൊണ്ട് കര കടലെടുക്കുന്ന പ്രതിഭാസം പ്രകൃത്യാ തന്നെ സംഭവിക്കുന്ന ഒന്നല്ലെന്നും മറിച്ച് അത് മനുഷ്യനിർമ്മിതമാണെന്നും ഇന്ന് ഏവരും ഏറെക്കുറെ അംഗീകരിക്കുന്ന വസ്തുതയാണ്. കൊച്ചി തുറമുഖത്തിന്റെ നിർമ്മാണമാണ് പടിഞ്ഞാറൻ കൊച്ചിയുടെ തീരത്ത് കടൽകയറ്റ പ്രശ്നം രൂക്ഷമാക്കിയതെന്ന യാഥാർത്ഥ്യം ആരും ഖണ്ഡിക്കാനിടയില്ല. അതിന്റെ ആഴം കൂട്ടിക്കൊണ്ടിരിക്കുന്നതിനാൽ തീരക്കടലിന്റെ ആഴം കൂടുകയും കടലാക്രമണം കൂടുതൽ രൂക്ഷമാവുകയും ചെയ്യുന്നു.കൊച്ചി തുറമുഖത്തിന്റെ കീഴിലുള്ള വല്ലാർപാടം ഇന്റർനാഷണൽ കണ്ടെയ്നർ ട്രാൻസ്ഷിപ്മെന്റ് ടെർമിനൽ പദ്ധതി കൂടി നടപ്പിലാക്കിയതോടെ കടൽകയറ്റത്തിന്റെ രൂക്ഷത ഒന്നുകൂടി വർദ്ധിച്ചു. ചെല്ലാനത്തെ ജനങ്ങൾക്ക് ഫിഷിംഗ് ഹാർബർ അനിവാര്യമായിരിക്കെ തന്നെ തികച്ചും അശാസ്ത്രീയമായി നടത്തിയ അതിന്റെ നിർമ്മാണം കടൽകയറ്റ പ്രശ്നത്തിന് ആക്കം കൂട്ടിയ ഘടകം തന്നെയാണ്. യാതൊരു വിധ കരുതൽ നടപടികളും സ്വീകരിക്കാതെ ഇപ്പോൾ നടപ്പാക്കിക്കൊണ്ടിരിക്കുന്ന ഹാർബർ വികസനവും ചെല്ലാനത്തിന്റെയും പടിഞ്ഞാറൻ കൊച്ചിയുടെയും തീരമേഖലയുടെ നിലനിൽപ് തന്നെ അപകടത്തിലാക്കുകയാണ്. ഈ മഴക്കാലത്ത് കൊച്ചിയുടെ തീരമേഖലയിൽ അനുഭവപ്പെട്ട അഭൂതപൂർവമായ കടൽകയറ്റം സൂചിപ്പിക്കുന്നത് അടിയന്തരമായ ഇടപെടലുകൾ ഉണ്ടായില്ലെങ്കിൽ ഈ പ്രദേശത്തിന്റെ നിലനിൽപ്പ് അപകടത്തിലാകും എന്ന് തന്നെയാണ്.
തെരഞ്ഞെടുപ്പിൽ മത്സരിക്കുന്ന രാഷ്ട്രീയ പാർട്ടികളുടെയും മുന്നണികളുടെയും സംഘടനകളുടെയും , കടൽകയറ്റ പ്രശ്നത്തിൽ നാളിതു വരെയുള്ള സമീപനം എന്താണ് ?
ഒരുവശത്ത് ഇപ്രകാരം കടൽകയറ്റം വർദ്ധിച്ചു വന്നപ്പോഴും മാറിമാറി നാട് ഭരിച്ച സർക്കാരുകൾ ഈ പ്രശ്നത്തോട് സ്വീകരിച്ച നിലപാട് തീർത്തും നിഷേധാത്മകമായിരുന്നു. ഇരുപതിലേറെ വർഷങ്ങളായി തീരസംരക്ഷണത്തിനായി സ്ഥാപിച്ചിരുന്ന പുലിമുട്ടുകൾ കടലിൽ താണുപോയിട്ട്. കഴിഞ്ഞ പതിനഞ്ചിലേറെ വർഷങ്ങളായി കടൽഭിത്തിയുടെ അറ്റകുറ്റപ്പണികളൊട്ട് നടന്നിട്ടുമില്ല. അധികാരികളുടെ ഈ നിസംഗതയ്ക്കെതിരെ ഈ മേഖലയിലെ ജനങ്ങൾ വർഷങ്ങളായി നടത്തിവരുന്ന പ്രതിഷേധങ്ങളോടും ബന്ധപ്പെട്ടവർ പുറംതിരിഞ്ഞു നിൽക്കുകയാണ് ചെയ്തിട്ടുള്ളത്
വാസ്തവത്തിൽ കൊച്ചിയുടെ എന്നല്ല, കേരളത്തിന്റെ തന്നെ തീരസംരക്ഷണ പ്രശ്നവുമായി ബന്ധപ്പെട്ട് മാറിമാറി വരുന്ന സർക്കാരുകൾക്ക് യാതൊരു കാഴ്ചപാടുമില്ല എന്നതാണ് യാഥാർത്ഥ്യം. 568 കിലോമീറ്റർ തീരമേഖലയുള്ള കേരളത്തിന്റെ 263 കിലോമീറ്റർ തീരവും കടൽകയറ്റ പ്രശ്നം കൂടുതലായി അനുഭവപ്പെടുന്ന പ്രദേശങ്ങൾ തന്നെയാണ്. ആഗോളതാപനം പോലുള്ള പ്രശ്നങ്ങൾ ഭീഷണിയുയർത്തുമ്പോൾ തന്നെ കേരളത്തിന്റെ തീരമേഖലയിൽ നിലവിൽ അനുഭവപ്പെടുന്ന കടൽകയറ്റ പ്രശ്നം സവിശേഷമായ കാരണങ്ങളാലാണ്. അതുകൊണ്ട് തന്നെ ഈ പ്രശ്നം നേരിടുന്നതിന് സമഗ്രവും ശാസ്ത്രീയവുമായ പദ്ധതികൾ ആവിഷ്കരിച്ച് നടപ്പിലാക്കേണ്ടതുണ്ട്. എന്നാൽ നിർഭാഗ്യവശാൽ അത്തരത്തിലൊരു സമീപനം സർക്കാരുകളുടെ ഭാഗത്ത് നിന്നും നാളിതുവരെ ഉണ്ടായിട്ടില്ല.
തീരസംരക്ഷണ കാര്യത്തിൽ സർക്കാരുകളുടെ അനാസ്ഥ നിറഞ്ഞ സമീപനം ബോധപൂർവ്വമായ ഒന്ന് തന്നെയാണെന്ന് കാണാൻ പ്രയാസമില്ല. കടൽകയറ്റ പ്രശ്നത്തിന് പരിഹാരം കാണാതെ , ജനസംഖ്യയിൽ ബഹുഭൂരിപക്ഷവും സാമൂഹ്യവും സാമ്പത്തികവുമായി പിന്നോക്കം നിൽക്കുന്ന തീരദേശ നിവാസികളെ പൊറുതിമുട്ടിച്ച് തുച്ഛമായ നഷ്ടപരിഹാരം സ്വീകരിച്ച് കുടിയൊഴിഞ്ഞ് പോകാൻ നിർബന്ധിതമാക്കുന്ന പുനർഗേഹം പോലുള്ള പദ്ധതികളാണ് സർക്കാർ നടപ്പിലാക്കുന്നത്. കേരളത്തിന്റെ തീരമേഖലയിലൂടെ ഇരുവശവും സൈക്കിൾ ട്രാക്കോടുകൂടി, 6500 കോടി രൂപ ചെലവിൽ നിർമ്മിച്ചുകൊണ്ടിരിക്കുന്ന തീരദേശ ഹൈവേ, ഇന്ത്യയുടെ തീരമേഖലകളിൽ വൻകിട മൂലധന ശക്തികളെ കുടിയിരുത്താനുള്ള കേന്ദ്ര സർക്കാർ പദ്ധതിയായ സാഗർമാല, സമുദ്ര സമ്പദ്‌വ്യവസ്ഥയെ ലോക സമ്പദ്‌വ്യവസ്ഥയുമായി കൂട്ടിയിണക്കാനെന്ന പേരിൽ നടപ്പിലാക്കുന്ന ബ്ലൂ ഇക്കോണമിയെന്ന ആഗോളീകരണ പദ്ധതി തുടങ്ങിയവയ്ക്ക് തടസ്സം തീരമേഖലയിൽ അധിവസിക്കുന്ന മത്സ്യത്തൊഴിലാളികളടക്കമുള്ള ജനതയാണ്. കടൽകയറ്റ പ്രശ്നത്തിന് പരിഹാരം കാണാൻ സർക്കാരുകൾ വിസമ്മതിക്കുന്നതിന്റെ യഥാർത്ഥ കാരണവും ഇതുതന്നെയാണ്. ഇക്കഴിഞ്ഞ കടൽകയറ്റത്തിന്റെ ദിനങ്ങളിൽപ്പോലും മന്ത്രി മെഴ്സിക്കുട്ടിയമ്മ ആവർത്തിച്ച് പറഞ്ഞത് തീരദേശവാസികൾ തീരം ഒഴിയണമെന്ന് തന്നെയാണ്. കടലിൽ കല്ലിടുന്ന പരിപാടി സർക്കാർ നിർത്തി എന്നതും മന്ത്രി ആവർത്തിക്കുന്ന കാര്യമാണ്. കടൽകയറ്റ പ്രശ്നത്തിന് കുടിയൊഴിപ്പിക്കലാണ് സർക്കാർ മുന്നോട്ട് വെക്കുന്ന പരിഹാരമെന്നും ഇതല്ലാതെ മറ്റൊരു ശാസ്ത്രീയ ബദലിലും സർക്കാരിന് താൽപ്പര്യമില്ല എന്നും വ്യക്തമാണ്
എന്നാൽ കടൽകയറ്റത്തിന്റെ സന്ദർഭങ്ങളിൽ പോലും ഒഴിഞ്ഞുപോകുകയല്ലാതെ മറ്റ് മാർഗ്ഗമില്ലെന്ന് പറയുന്ന അധികാരികൾ പക്ഷെ തെരഞ്ഞെടുപ്പ് വേളകളിൽ മാത്രം ജനങ്ങളെ ഓർക്കുകയും വാഗ്ദാനപ്പെരുമഴയും പദ്ധതി പ്രഖ്യാപനങ്ങളുമായി വരുന്ന കാഴ്ച ഈ നാട് ഒരുപാട് തവണ കണ്ടുകഴിഞ്ഞതാണ്. മാറിമാറി ഭരിച്ചവർ നൽകിയ ഉറപ്പുകൾക്കും വാഗ്ദാനങ്ങൾക്കും പക്ഷെ അധികകാലം ആയുസ്സുണ്ടാകാറില്ല. ജനങ്ങളുടെ കണ്ണിൽ പൊടിയിടാനായി എത്രയോ ഉദ്ഘാടന മഹാമഹങ്ങളാണ് ഇവിടെ അരങ്ങേറിയത്. പദ്ധതി പ്രഖ്യാപനങ്ങളുടെ പേരിൽ അധികാരികളെ അഭിനന്ദിച്ച് സ്ഥാപിച്ച ഫ്ളക്സ് ബോർഡുകൾ പരിസ്ഥിതി മലിനീകരണം സൃഷ്ടിച്ചതല്ലാതെ മറ്റൊന്നിനും ഉപകരിച്ചില്ല എന്നതും നാട്ടുകാർ കണ്ടതാണ്
ഏറ്റവുമൊടുവിൽ തെരഞ്ഞെടുപ്പ് പടിവാതിൽക്കൽ എത്തിനിൽക്കെ മുഖ്യമന്ത്രി പ്രഖ്യാപിച്ച സംസ്ഥാനതല തീരസംരക്ഷണ പദ്ധതി തന്നെ എത്രമാത്രം ലാഘവത്തോടെയാണ് സർക്കാർ ഈ പ്രശ്നത്തെ സമീപിക്കുന്നത് എന്നതിന്റെ ഉത്തമോദാഹരണമാണ്. സംസ്ഥാനതല പദ്ധതിയെന്ന പേരിൽ പ്രഖ്യാപിക്കപ്പെട്ട പദ്ധതിയുടെ മൊത്തം പദ്ധതി തുകയായ 200 കോടിയിൽ 186 കോടി രൂപയും ആലപ്പുഴ ജില്ലയ്ക്ക് വേണ്ടി മാത്രമാണ് നീക്കി വെച്ചിരിക്കുന്നത് എന്ന വസ്തുത മാത്രം മതി സർക്കാരിന്റെ സമീപനം തുറന്നുകാട്ടാൻ. പ്രസ്തുത പദ്ധതിയിൽ എറണാകുളം ജില്ലയ്ക്ക് അനുവദിച്ചിരിക്കുന്നത് വെറും 10 കോടി 30 ലക്ഷം രൂപ മാത്രം. പരാജയമെന്ന് നാട്ടുകാർ അനുഭവിച്ചറിയുകയും പരാജയമെന്നും അപ്രായോഗികമെന്നും മന്ത്രി മെഴ്സിക്കുട്ടിയമ്മ തന്നെ സമ്മതിക്കുകയും ചെയ്ത ജിയോ ട്യൂബ് പദ്ധതി പോലും ചെല്ലാനത്തിന് വേണ്ടി പ്രഖ്യാപിക്കപ്പെട്ട പദ്ധതിയിലുൾപ്പെടുത്തിയിരിക്കുന്നു എന്നറിയുമ്പോഴാണ് എത്രമാത്രം ജനവിരുദ്ധമായാണ് ഇക്കൂട്ടർ കാര്യങ്ങൾ മുന്നോട്ട് നീക്കുന്നത് എന്ന് വ്യക്തമാകുന്നത്. തദ്ദേശസ്വയംഭരണ തിരഞ്ഞെടുപ്പ് പ്രഖ്യാപിക്കുന്നതിന് തലേ ദിവസം ചെല്ലാനത്തെ കടൽഭിത്തി അറ്റകുറ്റപ്പണികളുടെ പദ്ധതി കൂടി പ്രഖ്യാപിച്ചിട്ടാണ് പതിവുപോലെ ഭരണക്കാർ വോട്ട് തെണ്ടാൻ ഇറങ്ങുന്നത്
നാലര വർഷം ഭരിച്ചിട്ടും ചെല്ലാനം കൊച്ചി തീരത്തെ കടൽകയറ്റ പ്രശ്നത്തിന് ഒരു പരിഹാര നടപടിയും സ്വീകരിക്കാത്തവരാണ് സിപിഎം നേതൃത്വം നൽകുന്ന ഭരണപക്ഷമെങ്കിൽ ഇതിന് മുമ്പ് ഭരണം കൈയാളിയ ഇപ്പോഴത്തെ പ്രതിപക്ഷവും ഇക്കാര്യത്തിൽ കുറ്റകരമായ അനാസ്ഥ തന്നെയാണ് പുലർത്തിയിരുന്നത് എന്ന് നാം മറന്നു കൂടാ. കേന്ദ്ര മന്ത്രിയായും സംസ്ഥാന മന്ത്രിയായും ഇന്നാട്ടിലെ ജനങ്ങൾ അവരോധിച്ച കോൺഗ്രസ് നേതാക്കൾ കടൽകയറ്റ പ്രശ്നത്തിൽ ക്രിയാത്മകമായ യാതൊന്നും ചെയ്തവരല്ല. കേന്ദ്രം ഭരിക്കുന്ന ബിജെപി സർക്കാരും കടൽകയറ്റ പ്രശ്നത്തിൽ യാതൊന്നും ചെയ്യാൻ കൂട്ടാക്കാത്തവർ തന്നെയാണ്. തീരസംരക്ഷണത്തിനായി സംസ്ഥാന സർക്കാരിന് നൽകിയിരുന്ന കേന്ദ്ര വിഹിതം പുനഃസ്ഥാപിക്കാൻ കൂട്ടാക്കാത്ത ബിജെപി സർക്കാർ തങ്ങളുടെ കീഴിലുള്ള കൊച്ചിൻ പോർട്ടിനെക്കൊണ്ട് കടൽകയറ്റ പ്രശ്നത്തിന് പരിഹാരം കാണാനുള്ള സാധ്യതയും നടപ്പിലാക്കാൻ തയ്യാറല്ല.
ഇപ്രകാരം നാടിന്റെ നിലനിൽപ്പിനെ തന്നെ അപകടത്തിലാക്കുന്ന ഒരു പ്രശ്നത്തിൽ വഞ്ചനാപരമായ സമീപനം പുലർത്തുന്ന രാഷ്ട്രീയക്കാർ തദ്ദേശസ്വയംഭരണ തിരഞ്ഞെടുപ്പിൽ വോട്ട് തേടി വീണ്ടും വരികയാണ്. വീണ്ടും പൊള്ളയായ വാഗ്ദാനങ്ങളിലും പ്രഖ്യാപനങ്ങളിലും വിശ്വസിച്ച് വഞ്ചിതരാകാൻ നിന്നുകൊടുക്കേണ്ടതുണ്ടോ എന്നതാണ് നമ്മുടെ മുന്നിലുള്ള ചോദ്യം. ദീർഘകാല പോരാടങ്ങളിലൂടെ നേടിയെടുത്ത വോട്ടവകാശം ഇന്ന് നമ്മളെ തിരിഞ്ഞുകൊത്തുന്ന അവസ്ഥയുണ്ടെങ്കിൽ അത് നാം മാറ്റിയേ തീരൂ. ജനങ്ങളുടെ വോട്ട് വാങ്ങി ജയിക്കുന്നവർ ജനങ്ങളുടെ തലയിൽ കയറി നിരങ്ങുന്ന അവസ്ഥ നാം അനുവദിച്ചു കൊടുക്കരുത്.
തെരഞ്ഞെടുപ്പിൽ മത്സരിക്കുന്ന രാഷ്ട്രീയ പാർട്ടികളുടെയും മുന്നണികളുടെയും സംഘടനകളുടെയുംപ്രാദേശിക തലത്തിലെ ഘടകങ്ങൾക്ക് ഈ പ്രശ്നത്തോടുള്ള സമീപനമെന്ത് ?
കടൽകയറ്റപ്രശ്നം പരിഹരിക്കുക എന്നത് പ്രാഥമികമായി സംസ്ഥാനസർക്കാരിന്റെ ഉത്തരവാദിത്തമാണെന്ന് പൊതുവിൽ അംഗീകരിക്കുമ്പോൾ തന്നെ , കേരളത്തിലെ രാഷ്ട്രീയപാർട്ടികളുടേയും സംഘടനകളുടേയും പ്രാദേശികഘടകങ്ങൾ ഈ കാര്യത്തിൽ ഭരണപരമായ നടപടികൾ ഉണ്ടാക്കാൻ എന്ത് പ്രവർത്തനമാണ് നടത്തിയത് എന്നതും ഈയവസരത്തിൽ പരിശോധിക്കപ്പെടേണ്ടതുണ്ട്. കഴിഞ്ഞ പഞ്ചായത്ത് ഭരണസമിതിയിൽ കേരളത്തിലെ പ്രധാനപ്പെട്ട എല്ലാ രാഷ്ട്രീയപ്പാർട്ടികളുടേയും അംഗങ്ങൾ ഉണ്ടായിരുന്നു. എന്നാൽ ഇവരാരും തന്നെ കടൽകയറ്റപ്രശ്നം പരിഹരിക്കുന്നതിന് ഫലപ്രദവും കാര്യക്ഷമവുമായ യാതൊരു നടപടിയും സ്വീകരിച്ചിട്ടില്ല എന്നതൊരു വസ്തുതയാണ്. തെരഞ്ഞെടുപ്പടുത്തപ്പോൾ മാത്രം കടൽകയറ്റ പ്രശ്നത്തിൽ പരിഹാരമാവശ്യപ്പെട്ട് പ്രതിപക്ഷ പാർട്ടികൾ നടത്തിയ സമരം തെരഞ്ഞെടുപ്പിൽ വോട്ട് മാത്രം ലക്‌ഷ്യം വച്ചുള്ളതാണെന്ന് കൊച്ചുകുട്ടികൾക്ക് പോലും മനസിലാവും. യാതൊരു ഉത്തരവാദിത്വവുമില്ലാതെ സമരമെന്ന പേരിൽ കഴിഞ്ഞ പഞ്ചായത്ത് ഭരണസമിതി ജലസേചനവകുപ്പ് എക്സിക്യൂട്ടീവ് എൻജിനീയറുടെ ഓഫീസിനു മുന്നിൽ നടത്തിയ അപഹാസ്യമായ സമരനാടകമല്ലാതെ മറ്റൊന്നും അവർ ചെയ്തിട്ടില്ല. സംസ്ഥാനം ഭരിക്കുന്ന മുന്നണി തന്നെയാണ് കഴിഞ്ഞ പഞ്ചായത്ത് ഭരണസമിതിയിൽ ഭൂരിപക്ഷമുണ്ടായിരുന്നത്. എന്നിട്ടും സംസ്ഥാന സർക്കാരിൽ സമ്മർദ്ദം ചെലുത്തി ഈ പഞ്ചായത്തിനെ കടൽകയറ്റത്തിൽ നിന്ന് രക്ഷിക്കുവാൻ വേണ്ട പ്രതിവിധികൾ നടപ്പിലാക്കാൻ അവർക്കും കഴിഞ്ഞില്ല. അതേസമയം പ്രതിപക്ഷത്തിരിക്കുന്ന വലതുമുന്നണിയാകട്ടെ ഈ പ്രശ്നത്തിൽ സംസ്ഥാന സർക്കാരിന്റെ അനാസ്ഥയ്ക്കെതിരെ ശക്തമായി പ്രതികരിക്കുന്നതിൽ പരാജയപ്പെടുകയും ചെയ്തു. മുൻപ് വലതുമുന്നണി ഭരിച്ചിരുന്നപ്പോൾ കടൽകയറ്റപ്രശ്നം പരിഹരിക്കുന്നതിൽ കാണിച്ച അനാസ്ഥയുടെ തുടർച്ച തന്നെയായിരുന്നു ഇത്. മറ്റൊരു പ്രബല കക്ഷിയായ ബി.ജെ.പിയാകട്ടെ മുൻ മോഡി സർക്കാരിൽ മന്ത്രിയായിരുന്ന അൽഫോൻസ് കണ്ണന്താനത്തെ കൊണ്ടുവരികയും പ്രശ്നം പരിഹരിക്കാമെന്ന് അദ്ദേഹത്തെക്കൊണ്ട് ഉറപ്പ് കൊടുപ്പിക്കുകയും ചെയ്‌തെങ്കിലും കേന്ദ്രസർക്കാരിനെ ഈ പ്രശ്നത്തിൽ ഇടപെടുവിച്ച് പ്രശ്നം പരിഹരിക്കുന്നതിൽ അവരും പരാജയപ്പെട്ടു. ഇന്ന് ഈ മുന്നണികളും രാഷ്ട്രീയപാർട്ടികളുമെല്ലാം പരസ്പരം ആരോപണങ്ങളും അവകാശവാദങ്ങളുമെല്ലാമുന്നയിച്ച് വീണ്ടും വോട്ട് തേടി ജനങ്ങളെ സമീപിക്കുമ്പോൾ കടൽകയറ്റപ്രശ്നം മാത്രം ഇപ്പോഴും പരിഹാരമില്ലാതെ തുടരുന്നു. ഈ തെരഞ്ഞെടുപ്പിൽ ഈ മുന്നണികളുടെ വഞ്ചനയിൽ പ്രതിഷേധിച്ചുകൊണ്ട് ഉയർന്നുവന്ന മറ്റൊരു ജനകീയകൂട്ടായ്മയായ ട്വന്റി ട്വന്റിയും മത്സരരംഗത്തുണ്ട്. പക്ഷെ , കടൽകയറ്റ പ്രശ്നത്തിൽ പരിഹാരമാവശ്യപ്പെട്ടുകൊണ്ട് ചെല്ലാനത്തെ അമ്മമാരുടെ നേതൃത്വത്തിൽ നടന്നു വരുന്ന ,നാനൂറ് ദിവസത്തോടടുക്കാറായ , ജനകീയസമരത്തിൽ ഉത്തരവാദിത്വത്തോടുകൂടി അണിചേരുവാൻ അവരും തയ്യാറായില്ല. പഞ്ചായത്ത് ഭരണം പിടിച്ചെടുത്തുകൊണ്ട് ഈ പ്രശ്നം പരിഹരിക്കാമെന്നാണ് അവർ കരുതുന്നത്. പക്ഷെ അതെങ്ങിനെ സാധ്യമാകുമെന്ന് ജനങ്ങൾക്ക് മുന്നിൽ വിശദീകരിക്കാൻ അവർ തയ്യാറായിട്ടില്ല. സ്വാഭാവികമായും ചെല്ലാനം-കൊച്ചി തീരത്തിന്റെ നീറുന്ന പ്രശ്നമായ കടൽകയറ്റ പ്രശ്നം എങ്ങനെ പരിഹരിക്കുമെന്ന് വിശദീകരിക്കാൻ നിലവിൽ ഒരു രാഷ്ട്രീയപാർട്ടികളും സംഘടനകളും തയ്യാറായിട്ടില്ല. ഈ സാഹചര്യത്തിൽ തെരഞ്ഞെടുപ്പിൽ വോട്ട് ചെയ്യേണ്ടതില്ല എന്ന് ആരെങ്കിലും തീരുമാനിച്ചാൽ അതിനെ കുറ്റം പറയാനും കഴിയുകയില്ല. പക്ഷെ, പഞ്ചായത്ത് തെരഞ്ഞെടുപ്പിൽ മത്സരിച്ച് ജയിച്ചാൽ ഈ പ്രശ്നം പരിഹരിക്കാൻ കഴിയുമെന്ന് വിശ്വസിക്കുന്ന ഒരു വിഭാഗം ആളുകളും നമുക്കിടയിൽ തന്നെയുണ്ട്.
അതുകൊണ്ട് ചെല്ലാനം-കൊച്ചി ജനകീയവേദി പഞ്ചായത്ത് തെരഞ്ഞെടുപ്പ് ബഹിഷ്കരിക്കണമെന്നോ ഏതെങ്കിലും പ്രത്യേക രാഷ്ട്രീയപാർട്ടിക്കോ സ്ഥാനാർത്ഥികൾക്കോ വോട്ട് ചെയ്യണമെന്നോ ആഹ്വാനം ചെയ്യുന്നില്ല. പക്ഷെ ഈ രാഷ്ട്രീയപാർട്ടികൾക്കും സ്ഥാനാർത്ഥികൾക്കും മുന്നിൽ ചില ചോദ്യങ്ങൾ ഉയർത്താൻ ചെല്ലാനം-കൊച്ചി ജനകീയവേദി തീരുമാനിച്ചിരിക്കുന്നു.
1) നിങ്ങൾ പഞ്ചായത്ത് തെരഞ്ഞെടുപ്പിൽ വിജയിച്ചാൽ കടൽകയറ്റ പ്രശ്നം പരിഹരിക്കുന്നതിന് നിങ്ങൾക്കെന്ത് പദ്ധതിയാണ് ജനങ്ങൾക്ക് മുന്നിൽ അവതരിപ്പിക്കാനുള്ളത് ?
2) ആ പദ്ധതി നടപ്പിലാക്കാൻ നിങ്ങൾക്കെത്ര സമയം ആവശ്യമാണ് ?
3) നിങ്ങൾ പറയുന്ന സമയത്ത് കടൽകയറ്റ പ്രശ്നം ശാശ്വതമായി പരിഹരിക്കാൻ വേണ്ട നടപടികൾ സ്വീകരിക്കാൻ നിങ്ങൾക്ക് കഴിഞ്ഞില്ലെങ്കിൽ രാജി വയ്ക്കാൻ നിങ്ങൾ തയ്യാറാവുമോ ?
കടൽകയറ്റ പ്രശ്നത്തിന് പരിഹാരം ആവശ്യപ്പെട്ട് ചെല്ലാനം കൊച്ചി ജനകീയ വേദി നടത്തിവരുന്ന അനിശ്ചിതകാല റിലേ നിരാഹാര സമരം 400 ദിവസം തികയാനിരിക്കുന്ന വേളയിൽ മേല്പറഞ്ഞ ചോദ്യങ്ങളെ അടിസ്ഥാനമാക്കി തെരഞ്ഞെടുപ്പിൽ മത്സരിക്കുന്ന മുന്നണികളുടെ നേതൃത്വങ്ങളെ ഒരു സംവാദത്തിനായി ജനകീയ വേദി ക്ഷണിക്കുകയാണ്. തീർച്ചയായും കടൽകയറ്റ പ്രശ്നത്തിന് പരിഹാരം കാണുന്നതിൽ
വോട്ട് ആർക്ക് ചെയ്യണം, വോട്ട് ചെയ്യണോ വേണ്ടയോ എന്നതെല്ലാം ജനങ്ങൾ അതിന് ശേഷം തീരുമാനിക്കട്ടെ
